A multinacional Europastry busca un cento de novos operarios para as súas plantas de Lugo
Adecco realiza as entrevistas entre os candidatos con vistas á súa incorporación inmediata aos postos de traballo
Ata un cento de novos empregos. Esa é a ampliación do cadro de persoal que está a levar a cabo a multinacional catalá Europastry nas súas plantas de Lugo, Outeiro de Rei e Begonte, dedicadas á elaboración de masas conxeladas de panadería. Segundo a empresa de traballo temporal que está a realizar as entrevistas, a incorporación farase efectiva de xeito inmediato.
"O traballo é a tres quendas de luns a venres. Se ten experiencia como operario de alimentación, mellor, pero tampouco é un posto que requira formación ou experiencia. O que máis valoramos é a predisposición para traballar nas tres quendas", explica Noel Muíños, director de Adecco en Lugo.
Unha quinta parte dos postos aínda están pendentes de ser cubertos, dadas as dificultades actuais para atopar man de obra. Máis aínda nun sector coma a da panificación.
"Nós incluso buscamos xente sen experiencia ningunha e intentamos formala. No noso caso, determinados horarios son difíciles de completar", sinala o panadeiro Francisco García.
Como incentivo, ademais da incorporación ao cadro de persoal, ofrécese a posibilidade de promoción na compañía, que en 2017 adquirira a firma luguesa Ingapán.
