Sargadelos manda o persoal de vacacións mentres arranxan deficiencias e os sindicatos din que é ilegal

O dono de Sargadelos, Segismundo García, enviou unha carta á Inspección de Traballo en que avisa que fixa a semana que vén como período vacacional na fábrica de Cervo.

Faino, segundo indica o comunicado, remitido tamén a Europa Press, "en tanto non se resolven convenientemente as faltas e deficiencias detectadas".

E é que este novo escrito de García enumera toda unha serie de circunstancias da planta que poderían afectar á saúde dos traballadores, aparte das 36 deficiencias xa detectadas por Inspección de Traballo que implicaron unha multa de 5.000 euros.

 

Todo iso, despois de que a Inspección de Traballo abrise un expediente tras comprobar que dúas traballadoras desenvolveron silicose.

Este escrito chega a so 72 horas de que comece ese período que pretende sexa "vacacional", algo que os sindicatos cuestionan. Din que, legalmente, un traballador ten dereito a coñecer as súas vacacións con dous meses de antelación ou é algo que se planifica no convenio colectivo, polo que, segundo fontes consultadas por Europa Press, isto trataríase dun permiso retribuído.

Os representantes da CIG e CCOO, Xorxe Caldeiro e José Antonio Zan, cualifican a situación de "esperpéntica", e aseguran que os traballadores non recibiran esta mañá ningunha comunicación sobre esas supostas vacacións.

O presidente da Xunta, Alfonso Rueda, elexía precisamente un deseño de Sargadelos como agasallo institucional no seu encontro en Santander coa presidenta de Cantabria, María José Sáenz de Buruaga.

Rueda amosaba a súa esperanza de que o empresario "entre en razón e as cousas volvan á normalidade". 

Desde o PSdeG, Xosé Ramón Gómez Besteiro confía en que desapareza a ameaza de peche sobre a fábrica de Cervo, unha vez se corrixan as deficiencias detectadas por Inspección de Traballo.

O Ministerio de Traballo solicita unha xuntanza urxente

Este venres transcendeu tamén que o Ministerio de Traballo e Economía Social solicitou unha reunión urxente coa dirección do Grupo Sargadelos, "dada a transcendencia das decisións empresariais adoptadas nas últimas horas na planta de Cervo".

Fontes do departamento consultadas por Europa Press sinalan que non é descartable que sexa a propia titular do ministerio, a galega Yolanda Díaz, a que se vexa co dono de Sargadelos, no caso de que este acepte manter esta reunión. En calquera caso, o cargo de Traballo que se entrevistaría coa dirección do grupo determinaríase en función do que marca o protocolo, precisan desde Traballo.

Argumentan que "esta decisión tomouse pola transcendencia dos feitos que afecta directa e subsidiariamente a moitas persoas en Galicia".

A fábrica segue pechada

O persoal de Sargadelos regresou á primeira hora deste venres á fábrica de Cervo, que segue pechada, tal e como acordaron este xoves os traballadores despois da reunión que mantiveron co administrador único da empresa.

Pasadas as 10 da mañá recibían a chamada do propietario da empresa para manter unha xuntanza.

Ao parecer, o propietario de Sargadelos, Segismundo García, prevé reabrir a fábrica nuns días, pero garantindo que estean corrixidas as posibles deficiencias detectadas pola Inspección de Traballo relacionadas con garantir a saúde do persoal nas instalacións.

García, daría marcha atrás á súa decisión de pechar a fábrica de Cervo se é posible emendar en tempo e forma as 36 deficiencias que detectou a Inspección de Traballo, para deste xeito protexer a saúde dos empregados, preto dun centenar.

O empresario inclúe novas cuestións relativas a seguridade laboral na fábrica

Nun escrito, o propietario explicaba este xoves que "non pretendemos un peche, simplemente ante a presenza de po de sílice cristalino canceríxeno entendemos que o noso principal deber, en tanto non se emenda o problema" é velar polos traballadores.

A inspección detectou dous casos de enfermidade laboral desenvolvida na factoría e pide á dirección que adopte medidas para que a sílice non siga afectando ao persoal. Segismundo García refírese agora a máis "problemas de hixiene laboral que poden afectar gravemente a saúde" de quen traballa na empresa.

Co mesmo ton que caracteriza os seus textos, enumera ata trece novas cuestións relativas á fábrica, a primeira delas "que as cubertas son de uralita, e é posible que a presenza de amianto tamén poida acabar deteriorando" a salubridade de empregados e dirección.

"Que os fornos de cocción funcionan a temperaturas moi elevadas sen que os empregados ao seu cargo dispoñan de traxes ignífugos, nin as salas onde se atopan estean convenientemente sinalizadas e illadas", prosegue.

En terceiro lugar, engade que os chans son "de baldosa esvaradía" e asegura que isto pode "ocasionar escorreduras, fracturas e accidentes de todo tipo".

Nesta liña, apunta que a pantalla dos computadores "carece de encubridores adecuados polo que o persoal administrativo vese exposto a fatiga ocular e posibles trastornos cognitivos e emocionais (sic)".

Mesmo, Segismundo García indica que "ao carecer de aire acondicionado, nos meses de inverno pásase moito frío e calor no verán".

"Que as cadeiras existentes, vellas e desgastadas, non proporcionan o confort ergonómico mínimo esixible, para impedir posibles dores lumbares ou traumatismos vertebrais", di, en relación a asuntos que non teñen que ver coas medidas que lle pide Inspección de Traballo, sobre a presenza de sílice e o seu efecto na saúde dos empregados.

Outro guión dedícao a "que as portas e ventás non cumpren a normativa actual" e un máis a que "as pasarelas de acceso ás plantas de produción son de madeira, teñen pingueiras e, en caso de incendio, non permitirían unha evacuación adecuada".

Na de embalaxe, segundo apunta, os operarios permanecen "demasiadas horas de pé coa consecuente deterioración locomotriz".

Neste punto, advirte de que, por estar a fábrica nun edificio BIC (ben de interese cultural) -feito ao que xa aludiu en anteriores misivas-, "é imposible adecuar un plan de evacuación á normativa vixente, co consecuente perigo en caso de continxencia grave".

"Habitualmente, os compoñentes da dirección traballan moito máis de 40 horas semanais sen facturar horas extra", afirma, e volve referirse a aspectos relativos aos xestores da empresa ao sinalar que "ás veces a dirección chama por teléfono fora do horario de traballo, e mesmo en festivo, para preguntar ou interesarse por asuntos de traballo".

Todo isto pono en coñecemento da Inspección de Traballo "para os efectos oportunos" e tamén informa á autoridade laboral das vacacións fixadas pola dirección para a semana que vén -notificación que se produce a menos de 72 horas do comezo do devandito período, o que o fai legalmente inviable-.