A compra de vivenda usada medra en Galicia dez puntos máis ca no resto de España
As cifras do INE reflicten que este xaneiro se rexistraron un 11 % máis de operacións inmobiliarias ca no mesmo mes de 2024
O primeiro mes do ano rexistrou as cifras máis altas de compravenda desde o ano 2008, o do final da burbulla do ladrillo
A Federación Galega de Empresas Inmobilairias vaticina para 2025 o máximo histórico dos últimos dezasete anos
Este ano 2025 comezou como rematou o 2024 a respecto do crecemento nas operacións inmobiliarias. As cifras da compra de vivenda de segunda man en Galicia, especialmente en zonas turísticas tanto da provincia da Coruña coma da de Pontevedra, non paran de medrar.
Galicia pechou o exercicio do 2024 co 22,3 % máis de venda de vivenda que o ano anterior, a maioría de segunda man. Isto supón que estamos dez puntos por riba do resto de España. Aquí nas Rías Baixas compran segundas vivendas e só o 15 % dos compradores son galegos.
Na inmobiliaria, Isla de la Luz, na Illa da Toxa ao seu administrador non lle sorprenden os datos que da o INE sobre o aumento da vivenda en Galicia nos doce meses do 2024. Tampouco que as operacións inmobiliarias de compra e venda estean dez puntos por riba das españolas. Aquí, hoxe, hai dez vivendas á venda, de segunda man, entre os 500.000 euros e os case tres millóns de euros.
"Parécenme datos moi reais. Incluso se houbera máis produto podería haber máis vendas porque agora mesmo hai moita demanda. A oferta que temos é a que temos. Non hai moito máis. E non penso que se masifique esto demasiado, sobretodo algunhas zoas porque non hai máis para medrar. O que haberá máis clientes, subirán os prezos, probablemente, pero agardemos continuar con esta calidade de turismo", conta a TVG Jorge Seguín, administrador da Inmobiliaria Illa de la Luz da Toxa.
O perfil do comprador, por exemplo nas Rías Baixas é o dunha familia de fóra que busca tranquilidade e refuxio climático para unha segunda residencia.
"Os clientes son case todos de fóra, o 15-20 % do resto de Galicia, o 50-60 % de Madrid e os que quedan do estranxeiro. Os que escapan do Mediterráneo veñen escapando das masificacións, con moitos estranxeiros e ambientes algo máis enrarecidos que hai anos, cortes de auga, e temperaturas extremas agora no verán, si", engade.
En Galicia nos doce meses do 2024 vendéronse 23.642 vivendas das que so 5.888 eran a estrear.
