Muimenta acolle a Moexmu, a feira que medra en tamaño e presenza de gando

A Moexmu, a Mostra Exposición que se celebra todos os anos en Cospeito, celebra este sábado unha xornada dedicada á gandería co concurso de gando frisón e a poxa de gando selecto. Xunto coa Semana Verde, a Moexmu é a outra gran cita de referencia para o sector agrogandeiro en Galicia desde hai 41 anos.

O recinto feiral Manuel Vila López de Muimenta, no concello de Cospeito, acolle durante toda esta fin de semana unha nova edición desta feira multisectorial que medra en tamaño e presenza de gando.

"Estivemos a piques de igualar a marca de participación de gando, tanto na vaca frisoa, como de exposición de rubia e despois a nivel maquinaria e do resto de expositores temos todo ocupado e tivemos que ocupar as pistas unidas ao recinto porque non nos chega a capacidade e entón estamos contentos de que despois de catro décadas a Moexmu segue viva", explica José Manuel Rus, coordinador da mostra.

Este sábado, as instalacións abriron cedo para expositores e gandeiros. Pouco despois, tivo lugar un dos momentos centrais da xornada, o concurso de gando frisón, na sección correspondente a xatas e xovencas, seguido da poxa de gando selecto. Este ano participan unha vintena de ganderías. En total, un cento de cabezas de gando para concurso e unha decena para a poxa.

"É o bonito, que acudan gandeiros de toda Galicia e tamén de Asturias e creo que toda esta xuventude que se está animando agora está axudando ao rexurdir dos concursos", afirma Manuel Sandamil  presidente de Africor Lugo e de Fefigra.

Ademais, a feira inclúe postos de artesanía popular e produtos galegos, sen esquecer o tradicional concurso de cans de palleiro, previsto para a tarde do domingo.