O negociador comercial da UE falará este venres con Washington para insistir nunha solución aos aranceis

O comisario europeo de Comercio Maros Sefcovic ten previsto falar este venres cos seus homólogos estadounidenses para insistir no diálogo para buscar unha saída negociada aos aranceis indiscriminados do 20 % que o presidente Donald Trump anunciou para todas as importacións procedentes da Unión Europea, que se suman aos gravames xa decretados para o aceiro e o aluminio e as producións de coches.

"Os aranceis inxustificados inevitablemente resultan contraproducentes", escribiu Sefcovic nunha breve reacción difundida en redes sociais horas despois do anuncio de Trump e tras pechar cos Estados Unidos o contacto deste venres.

"Actuaremos con calma, coidadosamente e de forma unificada, mentres calibramos a nosa resposta", argumentou o político eslovaco, quen quixo poñer o acento en que deste xeito se dará o tempo necesario para as negociacións.

O comisario, que fala en nome dos Vinte e sete en materia comercial por ser unha política competencia de Bruxelas, engadiu que, con todo, a Unión Europea non quedará de brazos cruzados se non se logra un acordo xusto.

Á falta de coñecer o detalle das medidas que sopesa Bruxelas, os servizos comunitarios traballan nunha lista de produtos estadounidenses que gravar a partir do 15 de abril en represalia polas taxas do 25 % que Washington impón xa ao aceiro e ao aluminio.

Os 27 discutirán as medidas o 9 de abril

Este paquete, cun impacto potencial de 26.000 millóns de euros, será discutido polos Vinte e sete o próximo día 9 co obxectivo de que poida entrar en vigor o 15 de abril, aínda que a recadación de gran parte deles atrasarase ata maio para cumprir co marco establecido pola Organización Mundial do Comercio (OMC).

De maneira separada, o Executivo comunitario debe calibrar a resposta forte e proporcionada coa que o bloque responderá aos aranceis que Trump defende como recíprocos e xustifica como unha reacción a políticas como a do IVE nos países da UE. Os ministros de Comercio da UE abordarán toda a situación nunha reunión extraordinaria o vindeiro luns en Luxemburgo.

Fontes comunitarias sosteñen que todas as opcións están sobre a mesa, pero evitaron aclarar se explorarán novos aranceis ou se pensan en activar por primeira vez o mecanismo contra presións económicas de terceiros países ata coñecer os detalles da aposta de Trump. Países como Francia suxeriron xa que esta represalia anticoerción apuntará a sectores clave para os Estados Unidos, como os servizos dixitais para taxar as grandes plataformas.