O ministro de Economía seguirá dialogando cos partidos e as comunidades a resposta ante os aranceis
O PP ofrece apoio pero reclama máis concreción nas medidas do Goberno
Podemos pide maior contundencia contra os intereses estadounidenses en España
Rueda di que a Xunta se vai reunir con todos os sectores afectados polos aranceis dos Estados Unidos
O ministro de Economía saíu satisfeito da rolda de contactos de urxencia cos grupos parlamentarios para abordar a crise dos aranceis e comprométese a manter aberto o diálogo para dar unha resposta conxunta.
"Todos os partidos entenden que se trata dunha ameaza para o conxunto da nosa economía e que temos que responder para protexer os nosos sectores, os traballadores e as industrias", aseguraba Carlos Cuerpo.
Na esquerda, Sumar apoia sen matices o plan anunciado por Sánchez, que xera receos en Esquerra Republicana. Podemos reclama máis contundencia.
"Ir en chanclas a esa guerra comercial paréceme un erro estratéxico de gran calado", dixo Ione Belarra tras reclamar a expropiación de bens estadounidenses en España.
O Partido Popular afirma que vai colaborar co Goberno, pero reclama máis concreción.
"O que temos é un embrión ao que debe ser un plan de resposta. Queda moito traballo por diante e moitas preguntas sen responder", explicaba Juan Bravo, vicesecretario de Economía do PP.
Reclaman máis axudas directas, que o ministro di que haberá que negociar en Bruxelas porque será quen cobre os posibles aranceis que se impoñan a productos estadounidenses. Si acepta a proposta dos populares de implicar as comunidades.
"O impacto pode ser distinto en cada comunidade autónoma e elas son as que coñecen a súa propia realidade", xustificaba Cuerpo.
O ministro comparecerá no Congreso o mércores e reunirase coas comunidades autónomas o xoves.
