O ministro de Economía pídelles apoio aos partidos na resposta aos aranceis
Carlos Cuerpo continúa coa rolda de reunións con todos os grupos parlamentarios, salvo Vox
O PP "téndelle a man" ao Goberno neste asunto
Para o Goberno español, os aranceis impostos por Trump non responden a ningunha lóxica. Para o ministro de Industria, Jordi Hereu, "é unha aberración económica o que está xerando, é traballar para a depresión económica".
Por esta razón, o executivo busca a unidade política. O ministro de Economía reuniuse este venres cos voceiros de seis partidos. Xa abrira a rolda co PP e a reunión, din, foi "cordial". Carlos Cuerpo agarda que esta sexa "a primeira de moitas".
Acudiu polo PP Juan Bravo, o seu vicesecretario de Economía. Este venres volveu reiterarlle ao Goberno a súa "man tendida, sempre e cando manteñamos esta colaboración".
O Partido Popular afirma que vai "colaborar" co Goberno. Piden, iso si, máis concreción no plan de resposta aos aranceis. "O que temos é un embrión do que debe ser", dixo Juan Bravo. Na súa opinión, "queda moitísimo traballo por diante e moitas preguntas sen responder".
Critica Bravo que dos 14.000 millóns anunciados, só 400 son a fondo perdido. Son os do Plan Moves 3 de axudas ao vehículo eléctrico. O ministerio para a Transición Ecolóxica reunirase o próximo luns con responsables autonómicos para avanzar en medidas como o mapa de puntos de recarga.
O Goberno apunta que os aranceis non van afectar as comunidades por igual, e por iso o titular de Economía, Carlos Cuerpo, considera que teñen que "involucralas". Impactará en sectores concretos e calcúlase que as exportacións españolas aos Estados Unidos poderían caer ata un 25 %.
Aínda así, os expertos apelan á acción. Para José Luis Bonet, presidente da Cámara de Comercio de España, "vai haber oportunidades tamén nos propios Estados Unidos, porque os aranceis afectan a todos". Afectan a todos, pero non por igual, depende do país. Produtos que compiten cos españois agora poden ter incluso aranceis máis altos.
