O sector do cerco pide racionalizar o rexistro de interaccións con mamíferos

Segundo os datos do Ministerio de Transición Ecolóxica, ata 82.000 golfiños mulares habitan, en zona de altura, as costas galegas. Menos numerosos son os arroaces no interior das rías. Pero si se constata que cada vez máis os cetáceos chegados doutras latitudes están a supoñer dificultades para a pesca. 

"Os mariñeiros, os patróns, cando ven que poden ter interaccións con mamíferos non largan as redes, porque llas desfán", relata Manuel Suárez, o xerente de ACERGA

Nunhas xornadas que reúnen en Sada o 57 % da frota do cerco de Galicia, os responsables da biodiversidade mariña do ministerio avogaban por facer compatible a actividade pesqueira coa conservación dos cetáceos, cun rexistro das interaccións, unha vez que se constata un notable incremento da presenza dos que antes eran propios doutras áreas do planeta.

"É algo do que non tomamos conciencia ata hai cinco anos. E o sector pesqueiro non ten a culpa da captura accidental, pero ten que anotala no diario de a bordo e reportala", declarou Rafael Centenera, xefe de Área na Subdirección Xeral de Biodiversiadde do MITECO.

Os patróns do cerco piden que a burocracia esixida se adapte á realidade do sector.

"Esta reunión é unha oportunidade anual para falar os problemas reais do sector, porque ás veces semella que as regulacións están moi lonxe do mar", dixo o Xerente de ACERGA, Manuel Suárez. 

Representantes do sector e as administración celebraron que as medidas de xestión e protección dos recursos deran excelentes resultados en bocarte, sardiña e xurelo, e admitiron que na xarda hai que mellorar a regulación.