O Goberno garante os descontos no transporte aínda que non haxa novos presupostos

O Goberno garante que as bonificacións no transporte público continuarán no segundo semestre do ano aínda que non se aproben uns novos presupostos xerais do Estado. As axudas actuais rematarán o trinta de xuño e a preocupación foi medrando entre os usuarios nas últimas semanas ao non ter a certeza de que pasará despois. Milleiros de persoas viaxan de balde en liñas como o Eixo Atlántico, onde é habitual que se esgoten as prazas.

Agora o Goberno garante que un tren de novas axudas chegará haxa ou non acordo para aprobar orzamentos. Asegurouno o Ministerio de Transportes na última conversa que tivo cos colectivos de usuarios cos que vén falando dende setembro. Confirmoulles que se aplicará o previsto no Real Decreto de xaneiro para seguir tirando do transporte público. A noticia é un alivio para os usuarios habituais.

"Foi un aforro duns trinta euros ao mes e a verdade é que axuda bastante porque incita máis a viaxar no transporte público e non coller o coche". "A min permíteme ir estudar porque se tivese que pagar cada viaxe que fago. O trimestre pasado debín terminar con 150 ou 200 viaxes". "Viaxo máis, antes ía pouco á Coruña e agora co abono vou máis a miúdo".

A partir de xullo ábrense as portas a outros descontos na Media Distancia: do corenta por cento para os abonos xerais e do cincuenta para os viaxeiros de menos de 26 anos. Os abonos infantís seguirán sendo gratuítos.

"É unha comodidade porque, se teño que facer pola estrada viaxes en coche, entre peaxes e gasolina aforro moito". "Son estudante e teño que ir todas as semanas e serían moitos cartos que tería que pagar".

No caso de Galicia, as bonificacións terán efecto nos trens de media distancia e nos Avant entre A Coruña e Ourense. Cómpre lembrar que tamén hai descontos para as liñas de autobús de titularidade estatal.