Interceptado un barco portugués con 250 quilos de polbo e case 900 artes ilegais
Gardacostas de Galicia e Garda Civil interceptárono fronte a Mougás e está retido en Baiona
Os tripulantes do Santa María Areias tentaron fuxir, pero finalmente foron conducidos ao porto de Baiona
O Servizo de Gardacostas de Galicia e a Garda Civil desenvolveron un operativo fronte as costas de Mougás en Santa María de Oia en que se incautaron de case 900 artes ilegais para capturar polbos e douscentos cincuenta quilos de cefalópodo, algúns de 200 gramos. O polbo está en veda en Galicia por parada biolóxica.
Nun primeiro momento os tripulantes do Santa María Areias tentaron fuxir, pero finalmente foron conducidos ao porto de Baiona onde o barco permanece retido e precintado.
Ao tratarse de augas exteriores a sanción vaina impoñer o ministerio de pesca.
Na confraría de pescadores de Baiona consideran esenciais estes operativos para atallar o crecente furtivismo con estes aparellos que arrasan co produto que está desovando.
