O PP planta a Bolaños na sectorial de Xustiza en protesta pola lei de eficiencia

As sete comunidades do PP coas competencias transferidas de Xustiza plantaron o ministro de Presidencia, Xustiza e Relacións coas Cortes, Félix Bolaños, na reunión que se celebra en Barcelona para abordar a nova lei de eficiencia xudicial, que entrou onte en vigor, ao considerar que se trata só dunha foto e non trata cuestións esenciais como o financiamento.

Bolaños tiña que presidir este venres en Barcelona a Conferencia Sectorial da Administración de Xustiza, pero finalmente suspendeuse por falta de quórum tras o plante das comunidades gobernadas polo PP. Os conselleiros das sete comunidades gobernadas polo PP decidiron non entrar na reunión, argumentando que non se fixou unha orde do día con puntos esenciais como o financiamento necesario para poñer en funcionamento a nova normativa, polo que cualificaron de "mera foto" a convocatoria.

O conselleiro galego de Xustiza, Diego Calvo, aseguraba que "durante toda a semana pedimos ao Ministerio que incluíse uns puntos da orde do día que críamos que eran necesario", e lamentaba que todas as respostas "eran vagas e sen compromiso".

Calvo dicía que "o Ministerio di que quere facer e todas as comunidades temos que facer seguidismo e nin sequera se nos escoita", polo que "non imos participar nun paripé de Conferencia Sectorial como querían facer hoxe aquí". 

Antes da hora fixada para a sectorial, o ministro Bolaños informou aos medios de comunicación sobre algúns dos datos económicos que implican a implantación da nova lei de eficiencia da xustiza.

Bolaños explicaba que o Goberno transferiu 325 millóns de euros ás doce comunidades que teñen competencias en materia de xustiza para poñer en funcionamento a nova lei de eficiencia que entrou onte en vigor, o que supón unha media dun mínimo de 40 millóns de euros por cada un dos doce territorios.

O custo total en 2025 para a aplicación da nova norma, incluíndo ás doce comunidades e ao Ministerio de Xustiza, ascende a uns 15 millóns de euros, detallou o titular de Xustiza.

O ministro defendeu que esta lei, ademais de achegarnos ao modelo europeo dando un "paso de xigante" cara a unha xustiza do século XXI, permite "aforrar custos", e cifrou en 290 millóns de euros o aforro que supoñerá nos próximos dez anos a súa aplicación.

Os conselleiros dos ámbitos de xustiza das comunidades do PP que decidiron non participar na reunión negaron recibir transferencia algunha do Goberno, e vincularon as achegas aos fondos europeos e non á propia lei en si.

As sete comunidades autónomas gobernadas polo PP que plantaron ao ministro e que provocaron a suspensión da sectorial por falta de quórum foron a de Madrid, Andalucía, Galicia, Cantabria, A Rioxa, Comunidade Valenciana e Aragón.

Tras o plante das comunidades gobernadas polo PP, o ministro cualificou de "descortesía e gamberrrismo institucional" a decisión adoptada por estes territorios, que buscan a "confrontación". O PP ten "comportamentos ultras" e "cada vez parécese máis como dúas pingas de auga a Vox", lamentou Bolaños.

Para o titular de xustiza, o PP perdeu xa "toda institucionalidade" como formación política.

As comunidades autónomas que si ían participar nesta sectorial que finalmente se suspendeu foron a de Cataluña, País Vasco, Navarra, Asturias e Canarias.

Todas elas lamentaron o plante dos populares, que "supeditaron os intereses partidistas aos xenerais" mediante unha "absoluta falta de respecto institucional". O conseller de Xustiza da Generalitat de Cataluña, Ramon Espadaler, reiterou o seu compromiso na despregadura da nova lei.