Cambios nos desafiuzamentos ou nos pisos turísticos coa nova lei de eficiencia da Xustiza

Este xoves entran en vigor varios aspectos que se atopan dentro da lei de eficiencia da Xustiza, unha ampla reforma da planta xudicial que recolle, ademais, modificacións en cuestións como os desafiuzamentos por ocupación, os visados de ouro ou a regulación sobre os pisos turísticos.

Esta lei impulsada polo Ministerio de Xustiza incorporou durante o trámite parlamentario múltiples emendas que reforman distintas leis.

Axilizar os desafiuzamentos en casos de ocupación

A norma introduce un cambio na lei de axuizamento criminal que permitirá axilizar os desafiuzamentos nos casos de ocupación. Trátase dunha modificación no artigo 795.1 desta lei pola que os delitos de usurpación de inmobles e de violación de domicilio pasarán a tramitarse polo procedemento abreviado (xuízos rápidos).

Consentimento da comunidade de veciños para pisos turísticos

Tamén reforma a Lei de Propiedade Horizontal, de maneira que os propietarios que desexen explotar os seus inmobles como pisos turísticos deberán contar co consentimento da comunidade de propietarios.

A modificación normativa busca apoderar os veciños e foi elaborada en colaboración con concellos e comunidades autónomas.

O obxectivo da reforma é dotar os residentes de maior capacidade de decisión na regulación destes alugueiros, que nos últimos anos xeraron un intenso debate nas principais cidades españolas debido ao seu impacto na convivencia e o acceso á vivenda.

Coa nova lexislación, as comunidades de propietarios poderán aceptar ou vetar a apertura de novas vivendas de uso turístico mediante votación en xunta, o cal supón un cambio significativo respecto á normativa anterior, que limitaba as opcións dos veciños para restrinxir esta actividade.

A nova redacción establece que a instalación de vivendas de uso turístico require do acordo expreso da comunidade de propietarios, sen necesidade de que se modifique o título constitutivo ou os estatutos, como ocorría ata o de agora en virtude da xurisprudencia do Tribunal Supremo.

Para que se poidan instalar novos pisos turísticos, requirirase o voto favorable das tres quintas partes do total dos propietarios, que representen, á súa vez, as tres quintas partes das cotas de participación.

Eliminación dos visados de ouro

Inclúe a eliminación dos visados de ouro, as golden visa, ao modificar a lei de apoio aos emprendedores e a súa internacionalización. Desta maneira, quedan suprimidos os visados e autorizacións pola adquisición de inmobles e investimentos en depósitos bancarios, débeda pública, accións, fondos de investimento e proxectos empresariais de interese xeral.

Foran aprobadas en 2103 para persoas non residentes na Unión Europea que investisen máis de 500.000 euros nunha vivenda en España ou máis de dous millóns en títulos de débeda pública española ou máis dun millón en accións ou participacións sociais de sociedades de capital españolas cunha actividade real de negocio.

Creación dos tribunais de instancia, aposta pola mediación e reforma das custas xudiciais

No ámbito de Xustiza, crea os tribunais de instancia, un órgano colexiado que integra todos os xulgados unipersoais e de primeira instancia nunha única organización en cada partido xudicial. Desta forma, os 3.931 xulgados unipersoais transformaranse en 431 tribunais de instancia.

Estes tribunais estarán apoiados polas oficinas de xustiza nos municipios, que substitúen aos antigos xulgados de paz e facilitan ao cidadán as xestións sen ter que desprazarse a unha capital de provincia.

A lei aposta pola mediación e a solución negociada ao conflito para abordar o exceso de litixios. Así, obriga, nos ámbitos civil e mercantil, a acudir á negociación entre as partes, os chamados Medios Alternativos de Solución de Controversias (MASC), antes de ir a xuízo.

Realiza ademais unha reforma do sistema de custas. Ata o de agora, as custas pagábaas quen perdía o xuízo, pero esta norma establece que hai que facer un intento por chegar a un acordo e, se unha vez concluído o preito se demostra que unha das partes, a pesar de ter razón, non tentou chegar a un acordo, o xuíz impoñerá o pago de custas porque se produciu un abuso dun servizo público.