Denunciados 21 vehículos por participar nunha carreira ilegal en Ourense
Os responsables terán que facer fronte a unha sanción económica de 500 euros e á retirada de seis puntos do permiso de condución
Os veciños da zona aseguran que levan meses sufrindo estas condutas e que non poden saír á estrada tranquilos
Un total de 21 vehículos foron denunciados pola Garda Civil acusados de condución temeraria por participar nunha carreira ilegal na subida a Castro de Beiro, no Concello de Ourense.
Os controis tiveron lugar o pasado venres cando unha multitude de mozos reuniuse na estrada OU-0520, unha vía en tramo ascendente que conecta o polígono de Quintela e a localidade de Castro de Beiro.
Un feito habitual nos últimos meses. Conforme indicou a Garda Civil, citáronse para participar e observar un espectáculo consistente en subir pola devandita estrada a grandes velocidades, facendo derrapaxes e alardes de modificacións técnicas nos coches.
Tras ter coñecemento destas posibles carreiras ilegais, o Subsector de Tráfico da Garda Civil de Ourense estableceu un dispositivo de vixilancia ao longo desa subida, coa intención de comprobar a veracidade destes feitos.
Como resultado foron denunciados un total de 21 vehículos por realizar conducións temerarias, xa que circulaban a grandes velocidades invadindo aleatoriamente ambos os sentidos de circulación, nunha vía con tramos sen visibilidade e que non estaba pechada ao tráfico.
Ademais, os axentes detectaron máis de 30 vehículos relacionados con estas condutas, verificando así mesmo que, tanto ao comezo do tramo como na metade, había varias persoas concentradas, cunha evidente relación cos feitos denunciados.
Os responsables terán que facer fronte a unha sanción económica de 500 euros e á retirada de seis puntos do permiso de condución.
A Xefatura Provincial de Trafico de Ourense velará por unha correcta identificación dos condutores non identificados, lembrando que neste caso a sanción ascendería a 1.500 euros por non identificar o condutor responsable.
Os veciños da zona aseguran que levan meses sufrindo estas condutas, que non poden saír á estrada tranquilos e que temen que algún día ocorra algunha desgraza, especialmente polos seus fillos.
