Atopa o piso ateigado de lixo despois de desafiuzar a inquilina en Noia
A propietaria pediu axuda do Concello para facer unha limpeza especializada ao considerar que a vivenda constitúe un problema de saúde pública
Desfeito e cheo de lixo e excrementos. Así é como atopou o seu piso unha veciña de Noia despois de desafiuzar a inquilina.
Había tempo que sospeitaba o que ocorría polo cheiro que saía da vivenda. Pero nunca imaxinou o que ía atopar ao recuperala.
Despois de moitos meses sen que a inquilina lle pagara o alugueiro, a dona do piso logrou desafiuzala a pasada semana.
Pero o pesadelo non rematara. Ao entrar na vivenda atopouna chea de lixo, con importantes danos, excrementos por todo o chan, e un gato que está en mans dunha protectora local.
A propietaria di que o seguro non se fai cargo da desfeita e pide axuda ao Concello para que lle axude a facer unha limpeza especializada canto antes.
Asegura que tal como está, trátase dun foco de infección e un problema de saúde pública do que xa advertira hai tempo os Servizos Sociais, ante a sospeita de que a inquilina puidese estar acumulando lixo.
