O 57% dos que buscan adelgazar proban algún tipo de dieta milagre
O efecto rebote das dietas milagre
O xaxún intermitente, a dieta detox, a Dukan e a cetoxénica, entre os métodos rápidos máis utilizados para perder peso
O 22% dos galegos sofren de obesidade
Segundo un informe elaborado por Mapfre e a Academia Española de Nutrición e Dietética, un 52% dos adultos españois teñen sobrepeso ou obesidade. Sete de cada dez probaron algunha vez perder peso e deles un 57% seguiu algunha das chamadas dietas milagre.
"Claro que si, pero agora non estou a dieta".
"Estes míticos TikTok que che aparecen para comer mellor, para estar máis delgada... desas cousas, si", contan na rúa.
Nin son dietas personalizadas nin contan con apoio científico, pero todo o mundo fala delas.
"As máis populares son a dieta de Atkins ou dieta cetóxena, dietas baixas en hidratos de carbono, agora púxose moi de moda o xaxún intermintente para a perda de peso", explica Giuseppe Russolillo, presidente da Academia Española de Nutrición e Dietética.
"Soen ser dietas que prometen resultados moi rápidos, en moi pouco tempo, pero que non adoitan ser moi eficientes, a verdade", apunta unha farmacéutica.
O maior problema é o efecto rebote. De media con elas pérdense uns 6 quilos e recupéranse máis de 5. Os expertos alertan dos riscos para a saúde destes métodos rápidos.
" A curto prazo, dores de cabeza, estrinximento, náuseas, vómitos, cansazo, malestar xeral pero a medio e longo prazo son realmente un problema porque poden danar o fígado, o ril e o corazón", continúa o experto en diética.
Aconsellan visitar un profesional da saúde que planifique un método a longo prazo porque é a única forma de garantir cambios de hábitos e resultados exitosos.
