Os novos pisos turísticos necesitarán de autorización da comunidade de propietarios
Os cambios na lei tamén contemplan a posibilidade dunha recarga do 20 % nos gastos comúns da comunidade
Cambios nos desafiuzamentos ou nos pisos turísticos coa nova lei de eficiencia da xustiza
En plena escalada de tensión no mercado do alugueiro, chega un cambio de normativa para os pisos turísticos.
"Teñen que pedir permiso ás comunidades de propietarios previamenyte á súa inscrición. E ten que aprobarse cunha maioría de tres quintos", explica Teresa Suárez, presidenta do Colexio de Administradores de Fincas de Galicia.
Non é o único cambio legal. Tamén poderán decidir unha recarga nas cotas á comunidade de ata un 20 % dos gastos comúns. E terán tamén máis poder para frear posibles incumprimemtos.
"Se se producen molestias, pódese prohibir que esa vivenda se poida seguir dedicando a uso turístico", di Teresa Suárez.
O veto das comunidades non terá efecto retroactivo sobre as vivendas que xa contan con autorización. Pero si se poderá aplicar o recargo nas cotas.
En Galicia existen unhas 26.000 vivendas de uso turístico. Din desde a asociación que agrupa aos propietarios que a normativa apunta un endurecemento das condicións para destinar un piso a alugueiro vacacional. E apuntan que non se están producindo conflitos de convivencia coas comunidades de propietarios.
"Vou ás xuntas de propietarios e recíbenme perfectamente. Non hai problema con iso", explica Óscar Iglesias.
E din desde a asociacion Aviturga que as medidas buscan limitar un mercado que está servindo de complemento de renda para pequenos propietarios ante a inseguridade do alugueiro tradicional.
"É unha limitación que pode prexudicar a calquera dos comuneiros que en calquera momento posterior ao acordo decida alugar a súa vivenda por días", argumenta Rafael Serrano de Aviturga
E advirten de que en cidades como A Coruña o cambio na normativa municipal que está previsto aprobar antes do verán acabará co 80 % das vivendas de uso turístico da cidade.
