Protesta dos veciños de Palmeira por unha antena ao pé das casas e do colexio

Cinco pasos contados, sete se son algo máis pequenos, dende o burato da antena ata a parede da casa que está máis pegada, a de Chicho, o principal afectado.

"É un núcleo de poboación bastante considerable que ía ser ampliado porque mesmo hai constructores que compraron terreos para urbanizar. Hai unha zona arbórea de carballeiras e de sobreiras".

Só uns metros máis alá escóitase o alboroto dos pequenos no patio do colexio. É o que máis indigna e tamén o que lles preocupa.

"Temos o colexio aí enriba. Os rapaces pasan aí horas e horas. Por que teñen que estar os rapaces expostos a todas esas ondas?", lamenta María José, outra veciña. 

As obras empezaron dun día para outro, sen previo aviso, nunha parcela pequena, de apenas uns metros e sen valor aparente, que casualmente comprou recentemente un veciño do concello, pero de fóra de Palmeira. 

"Ese señor de Ribeira xa o debeu comprar para especular porque seica pagan por eso", advirte Josefa, coa casa ao pé do colexio.

É o segundo intento. Outra compañía xa o intentara hai case 20 anos.

"Daquela houbera unha resolución do Contencioso Administrativo pola proximidade ao núcleo de poboación e polo colexio e fora favorable á non colocación", engade Chicho.

Hai alternativas. Terreos que ofreceu o propio Concello e mesmo particulares, coma Josefa. 

"Sobran sitios onde poñela. Eu teño dous terreos onda a autoestrada e díxenlles que llos daba, que foran para alá".

Mala antena é se non se pode desprazar 300 metros para riba que non hai ese núcleo de vivendas nin o colexio", lamenta Chicho.

A priori, teñen o Concello do seu lado, que se opón a esa instalación. Ao longo deste mes, segundo o propio alcalde, prevén unha xuntanza cun representante da empresa para que explique por que non aceptan outra localización, pero entre a veciñanza imponse o desánimo.