O Ibex rexistra a maior caída diaria en cinco anos nun venres negro global nas bolsas

Tras a xornada negra este xoves nos mercados de todo o mundo, en que as fortes perdas foron unha constante, a deste venres tamén está sendo de caídas en practicamente todas as bolsas alarmadas polos efectos que pode ter na economía o anuncio do presidente dos Estados Unidos, Donald Trump, de establecer aranceis xerais a todas as importacións aos EUA.

E se ben este xoves a caída no Ibex35 fora moderada, comparada con outros índices europeos, a deste venres había cinco anos que non se vía algo así. Perdeu este venres o 5,83 %, a maior caída diaria desde marzo de 2020, no inicio da pandemia, e pechou por baixo dos 12.500 puntos.

O índice de referencia do mercado nacional, o IBEX 35, con todos os seus valores á baixa, cedeu 769,2 puntos, ese 5,83 %, ata 12.422 puntos, nivel descoñecido desde hai dous meses. Na peor semana desde o comezo de marzo de 2022 caeu o 6,67 %, aínda que no ano acumula aínda unha subida do 7,13 %.

Se a bolsa madrileña xa abría con caídas, a resposta chinesa aos aranceis dos Estados Unidos, anunciando imporá taxas do 34 % ás importacións dende os EUA, acabou por esborrallar definitivamente o Ibex 35 que chegou a perder máis do 6 % a media mañá.

A bolsa de Milán, un dos peores resultados da súa historia

Importantes perdas tamén no resto dos mercados europeos.  A bolsa de Milán alcanzou un dos peores resultados da súa historia. O seu índice, o FTSE MIB,  caeu un 6,53%. O FTSE 100 londiniense rematou a xornada perdendo un 4,86%, foi a peor xornada bursátil desde que se declarou o confinamento pola pandemia. Situación similar en Francia, o  CAC 40 de París pechou a xornada cunha caída o 4,26%. Caída tamén en Francfort, o índice DAX 40 perdeu un 4,95% e acumula xa unha perda semanal do 8%.

O Nikkei sofre fortes perdas

En Asia, onde os principais mercados xa finalizaron a súa xornada, o Nikkei de Toquio apuntou unha forte baixada do 2,75 %, arrastrado un día máis por ese anuncio de aranceis, que no caso do Xapón serán do 24 %.

O ministro de Economía, Comercio e Industria do Xapón, Yoji Muto, advertiu este xoves que os novos aranceis anunciados polo presidente estadounidense poden minguar os investimentos nipóns na primeira economía mundial.

A bolsa de Seúl, o Kospi, pechou este venres cunha caída do 0,9 %, e iso que durante a xornada repuntou tras a decisión do Constitucional surcoreano de ratificar a destitución do presidente Yoon Suk-yeol.

Os mercados dos Estados Unidos deron as costas ao anuncio de Trump

Os principais indicadores de Wall Street caeron case un 6 %  noutra sesión marcada polos aranceis globais do presidente, a quen o Goberno chinés respondeu cunha represalia equivalente.

Ao peche da xornada, o S&P 500 perdeu un 5,97 %, o Nasdaq un 5,82 % e o Dow Jones de Industriais un 5,5 % tras último tramo de operacións altamente volátil polo temor a que se desate unha guerra comercial e que esta provoque unha recesión.

A volatilidade disparouse ata un 50 % na praza estadounidense, que rexistrou a súa peor xornada bolsista desde o ano 2020, marcado pola pandemia da covid-19, ao superar as xa avultadas perdas da véspera.

Nestes dous últimos días de reacción aos aranceis, Wall Street perdeu uns 6,4 billóns de dólares de valor, un récord, segundo The Wall Street Journal, e a cifra rolda os 10 billóns desde a investidura de Trump.

Por empresas, destacaron os retrocesos das enerxéticas ConocoPhillips (-9,5 %) e Chevron (-8,3 %); as tecnolóxicas Nvidia (-7,4 %) e Tesla (-10,4 %); ou as financeiras JPMorgan (-7,5 %) ou Citigroup (-8,1 %).

O barril de Brent, afúndese

O barril de Brent esborrallouse este venres un 6,5 % ata situarse nos 65,58 dólares ao peche da sesión no mercado de futuros de Londres tras coñecerse as represalias da China aos aranceis impostos polos Estados Unidos.

O cru do mar do Norte, de referencia en Europa, situouse nos seus niveis máis baixos desde abril de 2021, tras ceder 4,56 dólares respecto a a última negociación no Intercontinental Exchange, cando acabou en 70,14 dólares.