Morre Val Kilmer, o inesquecible Jim Morrison de 'The Doors'

O actor estadounidense Val Kilmer, que alcanzou a popularidade tras meterse na pel do cantante Jim Morrison ou do superheroe Batman, faleceu nos Ánxeles aos 65 anos, informou The New York Times.

Segundo informou a súa filla, Mercedes Kilmer, ao diario neoiorquino, o actor foi diagnosticado de cancro de garganta en 2014 e puido recuperarse, pero faleceu onte martes como consecuencia dunha pneumonía.

Kilmer tardou tempo en recoñecer que padecía cancro, non o fixo ata 2017, pero deixou de negar esa enfermidade cun documental autobiográfico, VAL, que se estreou no Festival de Cannes e no que ofreceu un inédito acceso ao seu estado de saúde e a súa intimidade.

Unha carreira meteórica repleta de papeis inesquecibles

Nacido nos Ánxeles, o carismático actor, con aires de estrela de rock interpretou papeis de rockeiro en varias ocasións nos inicios da súa carreira.

Debutou no cinema cunha parodia humorística de espías da Guerra Fría titulada Top Secret! (1984), en que interpretou un cantante estadounidense que compracía o público e movía as cadeiras en Berlín, involucrado sen sabelo nun complot de Alemaña do Leste para reunificar o país.

En 1986, Tony Scott elixiuno para a súa primeira película de grande orzamento, Top Gun (1986), un drama de aventuras sobre pilotos de caza da Mariña en adestramento, no que era o rival da estrela da película, Tom Cruise, con quen tamén participaría na súa secuela en 2022, Top Gun: Maverick.

Foi memorable o seu papel como o cantante Jim Morrison, icona da sensualidade psicodélica, en The Doors (1991), do director Oliver Stone, e meteuse na pel de Mentor, un Elvis conselleiro imaxinado polo protagonista antiheroe da película, interpretado por Christian Slater, en True Romance (1993), unha violenta historia de aventuras sobre drogas escrita por Quentin Tarantino e dirixida por Tony Scott.

Protagonizou xunto a Sam Shepard Thunderheart (1992), interpretando un axente do FBI; deu vida ao pistoleiro urbano Doc Holliday en Tombstone e a un ladrón elegante e astuto en The Saint (1997). Pero quizais o seu papel máis famoso foi o do superheroe Batman en Batman Forever (1995).

En Pollock (2000), protagonizada por Ed Harris no papel do pintor Jackson Pollock, interpretou o seu colega artista Willem de Kooning. Tamén a Filipo de Macedonia, o pai de Alexandre Magno (Colin Farrell), na grandiosa epopea de Oliver Stone Alexandre (2004).

Nunha entrevista en 2007, Stone confesaba: “A maioría dos actores recoñecen que Val ten algo diferente do que se ve á primeira ollada”. Para o dramaturgo e guionista David Mamet: “Val ten algo que os grandes actores teñen, fai que todo pareza improvisado”. 

Con fama de problemático e traumatizado pola morte repetina do seu irmán, Kilmer coñeceu o éxito pero tamén a derrota. Un divorcio complicado, a ruína, pero, sobre todo, a enfermidade, cruzaronse no seu camiño e acabaron transformando a fulgurante carreira dun actor que preparaba os seus papeis ata a extenuación e fixo do esforzo o sentido mesmo do seu talento.