Lorenzana confía en que o aval do Supremo "desatasque" a tramitación dos eólicos
O Alto Tribunal avala a tramitación ambiental da Xunta en catro sentenzas que poderían despexar o camiño a 77 proxectos que están suspendidos: "As instancias inferiores teñen que seguir esa doutrina", sinala a conselleira de Industria
María Jesús Lorenzana afirma que a instalación de parques eólicos en Galicia "permitirá descarbonizar a nosa economía" e "abaratar a factura dos fogares e das empresas"
Xunta e promotores agardan que antes do verán Europa desatasque o 'parón' eólico
A conselleira de Industria, María Jesús Lorenzana, cualifica como "importantes" as catro sentenzas emitidas polo Tribunal Supremo que "avalan a tramitacion feita pola Xunta nestes parques eólicos". Nunha entrevista no 'Bos días', a titular de Industria do Goberno galego lembra que existe unha enorme litixiosidade en Galicia en relación con estes proxectos, con 120 recursos enriba da mesa e 77 parques suspendidos.
Lorenzana confía en que as instancias inferiores "sigan a doutrina do TS" e permitan "desatascar" a suspensión dos proxectos eólicos na nosa comunidade. Segundo explicou, estas instalacións dotarán a Galicia de máis enerxía renovable que permitirá "descarbonizar a nosa economía e abaratar a factura dos fogares e das empresas".
Na entrevista, a conselleira sinalou a importancia de seguir avanzando na descarbonización e aproveitar os recusos que temos en Galicia. "Se somos capaces de aproveitar os recursos naturais imos ser capaces de gañar en autoabastecemento e aforrar en custos de transporte e en CO2".
A titular de Industria confesa que sería "desexable" o apoio do PSdeG e do BNG para modificar a Lei de Industria e Autonomía Estratéxica xa que, tal e como está redactada "é unha oportunidade perdida".
Ao seu xuízo, a lei é clave para o desenvolvemento industrial pero sería preciso, "deixar participar con poder decisivo as comunidades autónomas, porque estamos apegadas ao tecido produtivo, temos o coñecemento do territorio e somos os competentes para organizalo". Segundo dixo, "con poucas cousas, a lei podería marcar un fito importante na reindustrialización de Galicia".
