As empresas galegas xa sofren o efecto das medidas de Trump

Sopran ventos de incerteza dende o outro lado do Atlántico e xa hai empresas galegas que o están notando. O sector da eólica mariña, no que Galicia é potencia, afronta a paralización de proxectos de grandes parques que estaba previsto instalar na costa dos Estados Unidos. Trump di que deben construílos empresas norteamericanas.

"Estamos vendo incerteza pero sen dramatismo", afirma Raúl Rodríguez, o director de eólica mariña da empresa de enxeñaría Ghenova, unha multinacional con oficina en Ferrol. "Hai proxectos que se puxeron en suspenso pero non se cancelan", apunta durante un encontro celebrado en Vigo con empresas de Noruega.

Na automoción, mentres, temen efectos en cadea: se os fabricantes europeos venden menos coches nos Estados Unidos por mor dos aranceis posiblemente lles comprarán menos pezas ás empresas de compoñentes que existen en Galicia.

"A industria da automoción vai ter este impacto", revela Enrique Mallón, o secretario de Asime, a patronal do Metal. "Si estamos absolutamente preocupados, xa está a ter impacto".

Os anuncios tamén danan

En realidade, só o feito de anunciar aranceis xa afecta os negocios. Na conserva, por exemplo, poñen rumbo a novos mercados. Juan José Vicente, o director xeral de Orbe, explica que están buscando "outros países, incluso en Asia, abrir tamén mercado a África, para tratar de mitigar esas posibles perdas". E hai recortes tamén no viño, onde xa se frearon exportacións galegas aos Estados Unidos.