Dúbidas e sorpresas no primeiro día da autorización obrigatoria para viaxar ao Reino Unido

Nos aeroportos galegos había certa expectación por saber como funcionaría esa nova autorización obrigatoria na súa chegada ao Reino Unido. A algúns colleunos por sorpresa. Os que xa a solicitaran preguntábanse que sucedería ao aterrar, sen saber ben como se ía realizar o control.

No aeroporto de Santiago, estaban 32 estudantes do IES Pontepedriña que comezaban unha viaxe de seis días. Os seus titores explicaban que tiveran que facer a solicitude "de xeito individual, descargando unha aplicación no móbil". Un trámite dixital, obrigatorio xa, e cun custo de 10 libras, uns 12 euros. A solicitude queda asociada de forma dixital ao pasaporte.

Debe pedirse a través do sitio web do Goberno británico ou dunha aplicación móbil, e a resposta é normalmente inmediata, pero pode tardar ata 3 días. Ten unha validez de dous anos e permite permanecer no país seis meses. En dous anos o prezo da autorización subirá ás 16 libras.