Deteñen un home de Murcia acusado de asasinar con pastillas a filla da súa exparella
A nai da vítima di que o home quería vingarse dela pola ruptura
Á media tarde deste martes chamou á nai da pequena para dicirlle: "A nena xa está no ceo"
Ramona, á dereita, nai da nena asasinada, durante o minuto de silencio gardado este mércores no Concello de Murcia (EFE/Marcial Guillén)
Un home de 47 anos foi detido este martes na localidade alacantina de Torrevieja acusado de da morte dunha nena de cinco anos en Murcia, filla da súa exparella.
Fontes da investigación apuntan a que o sospeitoso aproveitou un traxecto en coche para subministrarlle pastillas ou algún tipo de substancia estupefaciente, e confirman que entre o detido e a súa exparella non había antecedentes por violencia machista.
Non obstante, a nai da nena, de nome Ramona, asegurou que o home a maltrataba de maneira constante e que, tras cometer o suposto crime, telefonouna para dicirlle que a súa filla “xa estaba no ceo”, acto que cometeu, insistiu, para vingarse dela tras a ruptura.
A parella mantivo unha relación de nove anos que Ramona rompeu o verán pasado e, desde entón, asegurou, a súa exparella non deixara de seguila e acosala. A relación definiuna tamén como “un inferno” no que el a insultaba de maneira reiterada, aínda que nunca chegou a denuncialo.
Tras a ruptura, segundo as fontes consultadas, era habitual que o arrestado, de nome Jesús, recollese á pequena na pedanía murciana de Patiño para pasar as tardes na casa familiar del situada en Llano de Brujas, a dez quilómetros.
Durante este traxecto que realizou coa nena, de nome Nadia, o detido, con antecedentes por consumo de drogas, proporcionoulle á nena medicamentos ou substancias estupefacientes. Unha vez se realice a autopsia nas próximas horas determinarase o tipo e a cantidade de pastillas inxeridas pola menor.
Foi o presunto autor quen a media tarde deste martes fixo esa chamada á nai na que lle comunicaba a morte da nena. Inmediatamente despois, a nai chamou aos pais do detido que localizaron o corpo da menor no domicilio de Llano de Brujas, detallaron a EFE as mesmas fontes.
Sobre as 22:00 horas deste martes, o home foi detido en Torrevieja tras avisar el mesmo a Garda Civil de que se atopaba preto do cuartel da localidade alacantina.
A nai da nena asasinada, fortemente conmocionada e rodeada de numerosos familiares e amigos, acudiu este mércores á mañá ao minuto de silencio convocado polo concello de Murcia en repulsa por este crime que, segundo explicou a delegada do Goberno central na rexión, Mariola Guevara, será previsiblemente tratado como un caso de violencia vicaria, aínda que é un extremo que deberá decidirse segundo avance a investigación.
Durante a concentración fronte ás portas do concello vivíronse momentos de tensión cando os familiares da vítima proferiron berros e insultos contra o presunto asasino, para o que clamaron xustiza.
