Preocupación en Avión por unha nova vaga de roubos en vivendas

Asaltos en polo menos tres viviendas do lugar de Beresmo e en Abelenda, no concello de Avión. Nunha delas empregaron unha reixa como escada para acceder ao piso superior pola ventá do baño. Unha vez dentro, remexérono todo na procura de obxectos de valor.

"Abriron caixóns e remexeron todo. Colleron xoias, que eran da miña nai, valoradas nuns seis ou oito mil euros", sinala Sara Basalo, vítima do roubo.

Levaron sobre todo xoias, aínda que deixaron outras que non apreciaron.

"Este reloxo non o levaron porque non sabían que é de ouro. E colleron uns bolsos que logo a Garda Civil atopou tirados no monte", comenta Sara.

Nestoutra vivenda os donos atoparon dous ladróns encapuchados dentro cando volvían á casa. Saíron fuxindo cun botín de xoias tamén. Os veciños están preocupados.

"E logo non imos estar preocupados..., xa non pode deixar un a casa soa con tranquilidade, porque veñen en calquera momento", di unha veciña. "Hai que ter coidado porque as casas están soas, e somos persoas maiores, e vén xente de fóra que non coñecemos e non sabe un con quen está falando", apunta outro veciño.

Poboación avellentada e vivendas baleiras durante moito tempo. Aumentou a instalación de alarmas, pero os roubos seguen producíndose. Non hai por agora rastro dos asaltantes.