Detidos dous homes acusados de numerosos roubos no rural de Marín
Interceptáronlles ferramentas, máquinas, un caiac e diversos obxectos procedentes dos roubos
Entraron en casas que son segunda residencia e mesmo celebraron festas dentro
As pescudas da Policía Nacional derivadas da denuncia de roubos con forza que houbo no rural de Marín nos últimos meses levaron á detención dos presuntos autores e á interceptación dun botín importante.
Axentes adscritos á comisaría de Marín tiveron que facer uso da forza para chegar a un dos investigados, residente no barrio de San Pedro, que se negaba a abrirlles a porta.
"Foi unha investigación laboriosa, porque se trata de zonas deshabitadas. Os roubos eran de madrugada, apenas había testemuñas, polo que custou identificar os individuos. Pediuse a autorización xudicial para entrar e rexistrar o domicilio. Custou entrar, porque o individuo non colaborou en ningún momento. Xa dentro, localizáronse obxectos procedentes dos roubos nesas vivendas, a maioría deles moi doado de vendelos en páxinas de compravenda. Falamos dun caiac, un cortacéspede, multitude de ferramentas.", explica Paula Novas, voceira da Policía Nacional en Pontevedra.
E non só roubaban nas vivendas. En moitas delas dedicáronse a facer festas, a comer, a beber.
Isto foi en casas usadas polos donos como segunda residencia en áreas como a da praia de Mogor. Tamén entraron roubar en alpendres e bares.
