En economía, que impere a razón, por Venancio Salcines

Donald Trump cree nas pedras filosofais, que a economía é algo tan sinxelo que cunha simple política arancelaria, agresiva, é certo, pero simple, vai ser quen de recuperar a industria que marchou. Pero o tempo mudou e a América dos setenta xa non volvera por moitos aranceis que proxecte. Un obreiro do metal do leste gaña nun mes máis que o seu equivalente hindú nun ano. Como darlle a volta a esta situación? Interesa darlle a volta?

Hai moitos enigmas sobre o impacto arancelario, pero en ningún caso ninguén, agás os acólitos de Trump, pensa que sexan positivos para os EUA. En todo caso, o que é evidente é que van sufrir un proceso inflacionario. Como quen se flaxela, eles van xerar artificialmente inflación. A incerteza, outro ingrediente tóxico para o crecemento económico, xa hai tempo que a lanzou á pista de baile o presidente norteamericano.

Que facer? Primeiro respirar e contar ata dez. Que eles vaian cara a unha recesión non quere dicir que nós teñamos que facer o mesmo. Por iso, poñeremos aranceis aos seus produtos se interesa; se non é o caso, non debemos facelo. O orgullo está ben, pero na economía é mellor a razón.