O Liceo cae da Champions con honra logo dunha quenda de penaltis

Partidazo o que fixo o Liceo na pista do Barcelos. Chegaba cun 4-6 en contra na volta dos cuartos de final da Liga de Campións e a piques estivo de deixar fóra a un dos equipos máis poderosos de Europa. Nos primeiros dez minutos xa gañaba por 1-3 grazas aos goles de Dava Torres, César Carballeira e Tato Ferruccio, que completou o mellor encontro de toda a temporada. 

Un erro de Carballeira xusto antes do descanso aproveitouno Poka para poñer o 2-3 pero nada máis volver do vestiario Nil Cervera volvía igualar a eliminatoria ao anotar o 2-4. Con ese resultado rematarían os 50 minutos malia que os colexiados asubiaron dous penaltis a prol do Barcelos que fallaron Miguel Rocha e Luis Querido.

Despois dun tempo suplementario sen goles tivo que decidirse o equipo que pasa á Final a Catro desde o penalti e aí non fallou o máximo goleador desta edición da Champions. Rocha foi o único dos nove lanzadores que atinou e leva o Barcelos ás semifinais. Houbo polémica no cuarto penalti executado polo Liceo porque o porteiro Acevedo se moveu antes de que Dava Torres fixera o lanzamento pero a parella italiana non mandou repetilo.