Jacobo Copa cre na fazaña: "Sabemos o que temos que facer, estamos preparados"

Unha semana despois de protagonizar un partido aberto e entretido para a afección, o Deportivo Liceo viaxa a Portugal co obxectivo de lograr unha fazaña (22:30 horas, Agalega.gal) que lle permita remontar os dous goles de vantaxe cos que abandonou o Barcelos A Coruña o pasado xoves e, así, meterse na final a catro da Champions.

Non é fácil a tarefa para os xogadores que dirixe Juan Copa, que se enfrontan a un conxunto que no que vai de tempada non perdeu ningún dos partidos que disputou nesta competición, o que lle permitiu ser primeiro do seu grupo con tres puntos de vantaxe sobre o Noia e o Porto, e sete sobre o Reus e o Barcelona, que quedou apeado da competición.

As opcións galegas son escasas, pero a reacción exhibida na segunda parte do encontro de ida fai que os coruñeses viaxen cun certo halo de esperanza.

Jacobo Copa: "Sabemos o que temos que facer, estamos preparados. Vai ser un partido moi físico".

En Riazor, viuse un Barcelos moi superior na primeira parte, cun hóckey moi vivo e que se atopou cun gol nada máis comezar o encontro e dous máis aos poucos minutos que foron de quitarse o chapeu. Aínda que o Liceo reduciu distancias por medio, un cuarto gol deixaba o partido case sentenciado antes de irse ao descanso.