Gilsanz: "Hai que acelerar, este equipo ten un obxectivo, que é volver a Primeira División"

Óscar Gilsanz afronta o final de curso con ambición. O Deportivo está preto de asegurarse a permanencia unha tempada máis na categoría de prata, pero ao técnico branco e azul non lle chega con esa meta e deixouno claro este venres na rolda de prensa que ofreceu antes do partido do domingo contra o Cádiz.

"Estamos nun momento no que non podemos parar, hai que acelerar, queremos máis porque este equipo ten un obxectivo claro, que é volver a Primeira División, e encantaríame axudar a ese obxectivo", apuntou o preparador deportivista.

O parte de lesións non mudou moito nos últimos días.

"O parte de lesións está un pouco similar ao da semana pasada, con Escudero, Ximo e Gauto fóra do grupo. Jaime incorporouse ao grupo esta semana, co cal, xa pode entrar na convocatoria. E Obrador ten algunha molestia aínda, está a se incorporar ao grupo e veremos a ver".

Gilsanz non quixo entrar moito no aspecto das queixas arbitrais.

"Eu, como adestrador, mantéñome á marxe das decisións arbitrais, fíxeno sempre. Fágoo porque seguramente os mesmos que me reclaman que me posicione o día que criticase algunha acción, criticaríanme a min porque estaría a poñer desculpas a unha posible derrota ou non".

Gustaríalle seguir no Deportivo?

"Non hai ningunha dúbida nese aspecto, sobre todo, porque fomos campións de España co Xuvenil, campións de Terceira co Fabril e evidentemente ese obxectivo do club de subir a Primeira División é un reto importante para todos".