O Liceo perde a Bruno Saavedra para os vindeiros dous meses

Malas novas en forma de lesións para o Liceo. Despois de debutar o sábado pasado na OK Liga diante do Igualada, partido que puidemos ver na G2 e G24, o xogador santiagués Bruno Saavedra (2005) sufriu unha rotura do escafoide que o terá afastado das pistas durante dous meses. 

Foi unha das apostas de Juan Copa para baixar a media de idade do club nesta temporada, un proxecto de futuro do hóckey galego pero Saavedra apenas poderá participar nesta primeira volta. Si se cumpren as previsións volvería para mediados de decembro, pasada a xornada dez do campionato. Unha rotación menos para un equipo que se emprega tan duro a nivel físico e nunha competición tan esixente como é a OK Liga.