O papa envía a súa primeira mensaxe dende o hospital: "Agradezo de corazón as oracións"

O papa Francisco mantense "estable", así como os seus parámetros hemodinámicos e as análises de sangue, sen novas crises respiratorias nin febre, ao cumprirse a súa terceira semana ingresado no hospital Gemelli de Roma.

"As condicións clínicas do Santo Padre mantivéronse estables respecto aos días anteriores. Aínda hoxe non presenta episodios de insuficiencia respiratoria" e "continuou coa beneficiosa fisioterapia respiratoria e motora".

O papa Francisco mandou a súa primeira mensaxe desde o Polilcínico Gemelli de Roma.

"Agradezo de todo corazón as oracións que fan pola miña saúde desde a praza, acompáñovos desde acá. Que Deus vos bendiga e que a Virxe os coide. Grazas", di Francisco cunha voz moi débil na mensaxe gravada e difundida antes do rezo do Rosario que se celebra por el cada noite na praza de San Pedro do Vaticano.

"Conmovido polas numerosas mensaxes de afecto que se lle envían a diario e agradecido polas oracións do pobo de Deus, o papa gravou unha breve mensaxe de audio de agradecemento", explicou o Vaticano ao difundir as palabras de Francisco.

O cardeal español Ángel Fernández Artime, proprefecto do Dicasterio para os Institutos de Vida Consagrada e as Sociedades de Vida Apostólica, foi o encargado de presidir este xoves o Rosario na praza de San Pedro do Vaticano, ante as decenas de fieis e membros da Curia que volveron reunirse para pedir por Francisco.

"Antes de comezar pedíronme que comparta con todos vós unha bela noticia, un agasallo: o Santo Padre enviou a todos os católicos que no mundo están preto del un saúdo cun audio", dixo ante os asistentes, que estalaron nun aplauso.

Segundo o último parte médico, difundido esta tarde, o papa mantense "estable", así como os seus parámetros hemodinámicos e as análises de sangue, sen novas crises respiratorias nin febre, ao cumprirse a súa terceira semana ingresado no hospital Gemelli de Roma.

A estabilidade do pontífice, que non presentou febre, levou aos médicos para atrasar ata o vindeiro sábado o seguinte boletín sobre as súas condicións de saúde, polo que mañá non se divulgará.

Ademais, o papa "dedicouse a algunhas actividades de traballo durante a mañá e a tarde, alternando o descanso e a oración", mentres que "antes do xantar recibiu a Eucaristía".