O presidente de Austria encarga á ultradereita a formación de Goberno

O presidente federal de Austria, Alexander Van der Bellen, encargou este luns ao ultradereitista Herbert Kickl, líder do partido liberal FPÖ, a formación dun novo goberno tras o colapso das negociacións entre conservadores, socialdemócratas e liberais.

Tras reunirse este luns durante unha hora con Kickl, o xefe de Estado dixo que lle encargou negociar co partido popular ÖVP sobre a formación dunha coalición de Goberno.

"O señor Kickl ten a confianza necesaria para atopar solucións viables no marco das negociacións gobernamentais, e desexa asumir esta responsabilidade, polo que lle encarguei que establecese conversacións co ÖVP sobre a formación dun goberno federal", dixo Van der Bellen.

"Non dei este paso ás présas, seguirei velando polo correcto cumprimento e observancia dos principios e normas da nosa Constitución", agregou o presidente, quen no pasado mostrouse contrario a un goberno liderado por Kickl.

É a primeira vez na historia de Austria que o FPÖ ultradereitista, gañador das eleccións do pasado 29 de setembro con preto do 29 % dos votos, recibe o encargo de formar un goberno.

"O ÖVP deu marcha atrás ao seu rexeitamento categórico a unha cooperación con Kickl. Esa é a nova situación", dixo Van der Bellen sobre o cambio de postura anunciado o domingo polo novo líder conservador, Christian Stocker. Este sucedeu onte ao ata o de agora chanceler federal e líder conservador, Karl Nehammer, quen anunciara a súa dimisión o sábado tras dar por fracasadas as negociacións para un goberno tripartito entre o ÖVP e o partido socialdemócrata SPÖ e os liberais Neos.

Nehammer era contrario a unha coalición co FPÖ baixo Kickl, ao que acusa de ser un perigo para a seguridade do país polas súas posturas xenófobas, prorrusas e críticas coa Unión Europea. Con todo, Stocker, ata o de agora secretario xeral do partido, anunciou o domingo que o ÖVP está agora disposto a negociar co FPÖ sobre a formación dunha coalición.

Gañador das eleccións de setembro

O FPÖ gañara a finais de setembro as eleccións xerais, cun 28,8 % dos votos, diante do ÖVP, cun 26,3 % das papeletas. Ante a aparente negativa de todos os partidos políticos de cooperar co FPÖ de Kickl, Van der Bellen encargou a formación de Goberno ao ÖVP, que xunto co partido socialdemócrata SPÖ e os NEOS liberais tentou formar un tripartito.

Kickl foi ministro do Interior ente 2017 e 2019 nun goberno liderado polo exchanceler conservador Sebastian Kurz. En xuño de 2021 asumiu, en plena pandemia do coronavirus, a presidencia do FPÖ e radicalizou o ton e discurso do partido.

Non só rexeita as medidas tomadas polo entón goberno conservador-ecoloxista contra o coronavirus, senón tamén o apoio occidental a Ucraína e as sancións contra Rusia, a cooperación da neutral Austria coa OTAN, e é crítico coa UE.

Un dos principais aliados de Kickl é o primeiro ministro húngaro, o ultranacionalista Viktor Orbán, co que formou a fracción Patriotas por Europa, o terceiro grupo do Parlamento Europeo.