O presidente de Austria encarga formar novo goberno sen a ultradereita

O presidente de Austria, Alexander van der Bellen, encargou este martes ao chanceler e líder do conservador ÖVP, Karl Nehammer, a formación dun novo goberno coa oposición socialdemócrata, tras constatar que ninguén está disposto a aliarse co partido máis votado nas eleccións do pasado 29 de setembro, o ultradereitista FPÖ.

"Encargo a Karl Nehammer, líder do segundo partido máis forte do Parlamento, que forme goberno", indicou o ecoloxista Van der Bellen nunha mensaxe na rede social X.

"Comuniqueillo persoalmente esta mañá e tamén lle pedín que inicie de inmediato negociacións co Partido Socialdemócrata (SPÖ)", engadiu no breve comunicado que case simultaneamente leu textualmente nunha comparecencia ante a prensa no Palacio Hofburg de Viena.

Ademais de buscar un acordo para coaligarse cos socialdemócratas, Nehammer deberá sondar se é conveniente incluír "un terceiro socio" para que a futura alianza no poder sexa "estable", explicou.

"Austria necesita un goberno íntegro, estable, que sexa capaz de actuar", subliñou.

O xefe do Estado comunicou así á poboación a decisión que tomou despois de manter varias roldas de consultas cos líderes dos cinco partidos que formarán parte do novo Parlamento, xurdido das lexislativas que gañou o FPÖ co 28,8 % dos votos.

Seguíronlle o democristián Partido Popular (ÖVP) co 26,3 %, o socialdemócrata SPÖ co 21,1 %, o liberal Neos co 9 % e Os Verdes co 8 %.

Lembrou que a vitoria do FPÖ non lle garante chegar ao poder porque, con 57 escanos nun Parlamento de 183 deputados, necesita socios para lograr unha maioría de Goberno e ningún partido se declarou disposto a coligase coa formación de extrema dereita.

Admitiu que a decisión anunciada este martes non se corresponde coa tradición de encargar a formación do novo goberno ao partido máis votado, algo que en Austria é o habitual aínda que non está estipulado como lei na Constitución.

"Esta vez non actuei así (como é o costume) porque se deu unha situación completamente inusual na que hai un partido co maior número de votos, por suposto, pero ningún dos outros partidos aparentemente quere traballar con el", explicou.

Á súa vez, o líder do FPÖ, Herbert Kickl, "deixoume claro que o FPÖ só participaría no goberno se el é o chanceler (xefe de Goberno)", continuou o presidente ao resaltar como se chegou a unha situación que cualificou de "punto morto clásico".

Con respecto ás razóns polas que os líderes das demais formacións rexeitan unirse á formación encabezada por Kickl, indicou que estes manifestaran diversas "preocupacións" sobre as posturas do FPÖ e como poderían afectar negativamente o país.

Entre elas, destacou riscos para a "democracia liberal, o Estado de dereito, a separación de poderes", así como unha "falta dunha actitude proeuropea" e unha "proximidade" ao Kremlin.

Segundo o presidente, tanto os conservadores como os socialdemócratas temen que "as enormes preocupacións de seguridade por parte dos servizos de intelixencia estranxeiros restrinxirían enormemente a cooperación con Austria se Kickl participa no goberno".

Ademais, manifestaríanlle o seu rexeitamento á "linguaxe divisiva e de odio" dos ultras, así como a "unha imaxe retrógrada das mulleres".