O Racing, superado polo Granada nos Cármenes (3-0)
O conxunto granadino dominou con solvencia e plasmou o seu mellor xogo cos goles de Manu Lama e Rubén Sánchez
O cadro ferrolán segue afundido a catorce puntos da permanencia
O Racing apañou a sexta derrota consecutiva nos Cármenes, que o deixa a catorce puntos da salvación e cada vez con menos marxe de manobra. O Granada de Escribá limitouse a agardar o seu momento de afondar nas feridas racinguistas, e este chegou superada a media hora da primeira metade. Logo dun remate de Lucas Boyé ao lateral da rede e doutro de Manu Lama ao que respondeu Yoel cun paradón, o propio Manu Lama abría a conta á saída do córner.
E non houbo reacción do cadro de Menéndez. Porque, só cinco minutos despois, Rubén Sánchez asinaba o 2-0 que deixaba contra as cordas o equipo galego.
Tras o paso polos vestiarios, o Racing buscou a reacción, e creou ocasións. A máis clara, un remate de Dorrio que marchaba fóra por pouco. Pero o equipo está nunha desas fases en que todo sae do revés e, á primeira que tivo o Granada á contra, Tsitaishvili facía o 3-0. Aínda así, Dorrio volveu insistir e topou desta volta con Diego Mariño nun claro remate.
Os minutos pasaron, co Racing incapaz de danar o seu rival.
A derrota é a sexta consecutiva para un equipo que non atopa solucións.
