Todos os hospitais galegos poden tramitar baixas por cirurxía a partir desta semana
Deben ser intervencións programadas e non ambulatorias, que precisen ingreso
O Lucus Augusti de Lugo xa comezou a facer este trámite o 17 de febreiro
A partir desta semana, todas as persoas que teñan unha cirurxía programada en calquera hospital galego van poder tramitar a baixa desde o mesmo día de ingreso no propio centro hospitalario.
O servizo de admisión encargarase de facer a xestión, sempre que as intervencións non sexan urxentes nin ambulatorias. As previsións do Servizo Galego de Saúde é que máis adiante se estenda a outros servizos.
O complexo hospitalario Lucus Augusti de Lugo comezou a facer o trámite como avanzada o 17 de febreiro e agora comeza a facerse no resto.
A medida pretende facilitarlles a xestión ás persoas usuarias e aliviar a carga de traballo administrativo do persoal médico de familia, que vai seguir encargándose dos controis e dos partes de confirmación.
