O TSXG anula parte dunha liña eléctrica por afectar o Camiño Portugués e o Castro Lupario
A sentenza estima o recurso presentado polo Concello de Rois contra a autorización da Xunta
O tribunal recoñece a existencia dun territorio histórico e dun conxunto patrimonial de valor cultural
O Tribunal Superior de Xustiza de Galicia anulou parte do proxecto dunha liña eléctrica de alta tensión autorizada pola Xunta de Galicia, ao considerar que afecta negativamente o entorno do Castro Lupario e o Camiño Portugués a Santiago de Compostela.
A sentenza dá a razón ao Concello de Rois, que presentara un recurso contra o acordo do Consello da Xunta polo que se aprobaba a construción e se declaraba a utilidade pública da infraestrutura.
O tribunal considera que os bens patrimoniais da zona o Pazo de Angueira de Castro, o Castro Lupario, o Pazo do Faramello e o propio Camiño Portugués- forman parte dun territorio histórico e dunha paisaxe cultural unificada, que deberon ser analizados conxuntamente na avaliación de impacto ambiental.
Segundo o TSXG, non abonda con estudar eses elementos por separado. A convivencia nun mesmo espazo dun castro vinculado á figura lendaria da raíña Lupa e dun tramo do Camiño Portugués constitúe “un fito único en toda a ruta xacobea”.
A sentenza sinala que estes bens, xunto cos dous pazos catalogados da contorna -un de orixe baixo medieval e outro do século XVII-, “testemuñan a evolución histórica de Galicia” e integran “unha mesma historia cultural, patrimonial e espiritual sen a cal Galicia sería hoxe un pobo diferente”.
O TSXG tamén subliña que a Lei de Patrimonio Cultural de Galicia ampara este tipo de bens, mesmo cando non existe un expediente administrativo previo de protección individual.
O tribunal entende que o tendido aéreo vulnera esa protección ao atravesar o Camiño Portugués sen xustificar a idoneidade do punto escollido para o cruce. Engade que o impacto visual xerado é evidente, indefinido no tempo e incompatible co valor histórico e paisaxístico do territorio.
A resolución establece que debe prevalecer o contido do informe do Consello da Cultura Galega fronte ao da Dirección Xeral de Patrimonio Cultural da Xunta. Este primeiro acredita a presenza dunha pluralidade de elementos patrimoniais que configuran un territorio histórico recoñecible e unha paisaxe cultural de valor.
A sentenza non é firme. Contra ela cabe interpoñer recurso ante o Tribunal Supremo.
