Prisión provisional para cinco detidos por asaltos a vivendas na provincia de Ourense
Están acusados dun delito de roubo con violencia e intimidación en casa habitada, lesións e organización criminal
Un deles é informático no concello de Xinzo, onde se practicaron rexistros
O xulgado de Bande decretou este xoves prisión provisional para os cinco detidos por asaltar violentamente vivendas na provincia de Ourense.
Entre os arrestados está o informático do concello de Xinzo onde a Garda Civil tamén fixo rexistros e comisou documentación.
O alcalde de Xinzo quixo enviar unha mensaxe de tranquilidade aos veciños e apelou a "deixar traballar" ás forzas da orde para esclarecer os posibles delitos.
Esta operación iniciouse hai un mes tras o asalto a un empresario da construción na súa casa de Lobios.
Os asaltantes deixárono gravemente ferido para roubarlle diñeiro.
Os investigadores cren que os arrestados formaban parte dun grupo criminal dedicado a cometer roubos en vivendas pero tamén se sospeita a súa posible relación co tráfico de drogas.
A operación continúa aberta e baixo segredo de sumario.
