Rusia advirte de que armar Ucraína non é un plan de paz

O Kremlin rexeita a nova iniciativa europea para tentar solucionar o conflito en Ucraína. O portavoz do Goberno ruso, Dmitri Peskov, asegura que financiar o Exército ucraíno non é un plan de paz.

"Alí (en Londres) escoitáronse declaracións sobre a necesidade de garantir con urxencia un maior nivel de financiamento para Ucraína. Iso claramente non é para un plan de paz, senón, seguramente, para a continuación das accións militares".

Peskov considera que Occidente comezou a perder parcialmente "a súa condición de colectivo", e observa unha "fragmentación e matices nas posicións de varios países e grupos de países".

Denuncia que un grupo de países constitúen "un partido de guerra", e están dispostos a seguir apoiando a Ucraína e garantir a continuación das operacións militares". Neste senso advirte que a parte rusa continuará coa operación militar (en Ucraína) co fin de "cumprir todos os obxectivos expostos desde o seu comezo".

Macron e Starmer propoñen unha tregua aérea, marítima e enerxética dun mes en Ucraína

O presidente francés, Emmanuel Macron, anunciou este domingo que el e o primeiro ministro británico, Keir Starmer, puxeron sobre a mesa unha "tregua no aire, no mar e nas infraestruturas enerxéticas" de Ucraína que duraría un mes.

Nunha entrevista ao diario Le Figaro, o xefe de Estado galo explica que a despregadura de tropas doutros países sobre o terreo para manter a paz sería nunha segunda fase do plan. 

Para construír unha arquitectura europea de defensa será clave o Consello Europeo Extraordinario do próximo 6 de marzo, onde se deberá debater como financiar esas medidas. Macron estima que, "nun principio", Europa precisa "uns 200.000 millóns de euros para poder investir" en defensa.

O Goberno non pon pégas ao envío de tropas, pero veo prematuro

O ministro de Asuntos Exteriores, José Manuel Albares, asegurou que España "non ten ningún problema" con enviar tropas ao exterior, pero cre que nestes momentos en Ucraína "o esforzo aínda é ante todo político e diplomático".

En senllas entrevistas en Tele 5 e RNE, Albares reiterou que o noso país "nunca deu as costas a ningunha misión verdadeiramente de paz", pero advirte de que esta non pode interpretarse como unha paréntese "que permita ao agresor tomar un respiro para volver agredir".

Sobre a posibilidade de incrementar o gasto en defensa como promove a presidenta europea, Ursula von der Leyen, o xefe da diplomacia española explicou que España está comprometida en chegar ao 2 % do PIB en investimento militar en 2029, pero, se agora hai unha ameaza de seguridade para Europa que require incrementar ese gasto "de maneira moi rápida", o financiamento tería que ser europeo.

O ministro valora positivamente a reunión de onte en Londres, auspiciada polo primeiro ministro británico, Keir Starmer, e sinalou que a posición do presidente español é clara en favor da paz, pero hai que estar seguros de que todos dan "o mesmo contido á palabra paz".