Semana de arte urbana en Carballo na décima edición do Rexenera Fest

O artista sevillano Alberto Montes inspírase na natureza alá por onde vai. No Rexenera Fest crea un mural de chorimas, follas de carballo ou castiñeiro que contemplou paseando á beira do río Anllóns.

O propio artista explica o proceso creativo: "Fago intervencións de xeito dixital fragmentando o que vexo e modificando o punto de vista e a forma habitual de entendelo, e propoño darlle un novo significado, unha nova lectura".

Desta volta, o festival internacional de arte urbana de Carballo ten como epicentro o barrio da Lagoa.

"O barrio ten unha vida singular dentro do que é a vida urbana e non deixa de ser un espazo moi espacial. Nótase en como se comporta con menos tráfico, cunha vida moito máis calmada. E esa singularidade do barrio tamén a quixemos tratar no Rexenera e creo que os artistas tamén o entenderon e están plasmando dentro das súas propias pinturas o barrio e esa singularidade", asegura Xosé Regueira, concelleiro de Turismo en funcións de Carballo.

Seis son os artistas convidados. Veñen de México, Bélxica, Salamanca e Zaragoza, e está tamén o galego Maz. En dez anos de historia o Rexenera pasou de ser un experimento urbano e social a converterse nun referente nos foros internacionais.

Para Xosé Regueira: "É unha marca que se fixo con ela a propia sociedade e agora a sociedade cada vez que se fala de Carballo reivindica as súas pinturas, a súa galería urbana e iso tamén nos deu a oportunidade de trasladalo ao ámbito estatal e internacional".

O Rexenera Fest continúa ata o domingo cun programa de actos que inclúe concertos e rutas guiadas por unha galería de arte urbana que conta con máis dun cento de obras de gran formato.