Vitoria inesperada da esquerda en Francia que, xunto co partido de Macron, deixa a ultradereita como terceira forza

A esquerda francesa protagonizou este domingo un gran envorco electoral ao quedar na cabeza das lexislativas, por diante do bloque macronista, o que relegou á favorita, a ultradereita de Marine Le Pen, ao terceiro lugar.

Cos 577 escanos da Cámara xa asignados, a Nova Fronte Popular (NFP) de socialistas, comunistas, ecoloxistas e a máis radical A Francia Insumisa (LFI) quedou en primeiro lugar con 182 escanos, máis outros 13 independentes de esquerda, segundo os datos oficiais do Ministerio do Interior.

Segundo os datos do Ministerio do Interior, o bloque macronista e oficialista, formado por tres partidos, quedou con 168 asentos. Unha caída importante con respecto aos 250 que tiña, pero moito menos dura da que agoiraban as enquisas.

Xusto o contrario lle sucedeu á ultradereitista Agrupación Nacional que, con 143 deputadas e deputados, queda terceira. Son 54 máis dos que tiña, un resultado histórico, pero lonxe do que esperaba tras gañar a primeira volta e manterse en cabeza nas enquisas ata o último día da campaña.

O xiro imprevisto que supuxeron as proxeccións, seguidas dos resultados que chegaban a contagotas, foi recibido cunha explosión de alegría na simbólica Praza da República por miles de simpatizantes da esquerda que se congregaron no seu lugar habitual de concentración.

Dimisión do primeiro ministro

Fontes do Elíseo avanzaron que Macron, que esta semana viaxa a Washington para participar no cume da OTAN, vai deixar pasar un tempo ata que se instaure a nova Asemblea Nacional "para tomar as decisións necesarias", é dicir, para decidir sobre o Goberno que se poida constituír.

O primeiro ministro francés Gabriel Attal anunciou que este luns vai presentar a súa dimisión, pero amosouse disposto a dirixir o Executivo de xeito provisional ante a situación de bloqueo parlamentario e pola proximidade dos Xogos Olímpicos.

"O noso país afronta unha situación política sen precedentes e prepárase para acoller o mundo nalgunhas semanas. Por tanto, asumirei evidentemente as miñas funcións todo o tempo que o deber me esixa", engadiu nunha declaración oficial tras coñecer as proxeccións de escanos.

Attal pediulles "responsabilidade" aos grupos políticos porque no novo mapa político "os extremos non poden impulsar unha maioría absoluta" na Asemblea.

O primeiro ministro saínte asegurou que estas eleccións evitaron os tres grandes perigos que, ao seu parecer, axexaban o país: unha maioría da extrema dereita, unha maioría do NFP cun forte influxo da extrema esquerda e a liquidación do movemento político macronista.

Reacción de Mélenchon

O líder da esquerda radical francesa Jean-Luc Mélenchon esixiulle ao presidente Emmanuel Macron o nomeamento dun primeiro ministro da alianza de esquerdas.

Nun discurso pronunciado ante centos de persoas reunidas na capital para celebrar a vitoria da esquerda, Mélenchon considerou un "alivio" que non se producise a vitoria anunciada da extrema dereita.

Porén, tamén manifestou que os resultados "confirman a derrota do presidente e da súa coalición" e pediulle que "non tente escapar desa derrota con subterfuxios".

O líder da esquerda contestataria asegurou que o xefe de Goberno ten que ser da Nova Fronte Popular, a coalición de esquerdas que o seu partido, A Francia Insubmisa, formou con socialistas, comunistas e ecoloxistas.

"E ten que aplicar o seu programa e só o seu programa", recalcou Mélenchon, que rexeitou entrar en negociacións coa coalición de Macron.

Ademais, dixo que o novo Executivo ten que aplicar o seu programa "por decreto", con medidas como a derrogación da reforma das pensións aprobada o ano pasado por Macron, introducir o bloqueo dos prezos dalgúns produtos e subir o salario mínimo.

Avaliación de Bardella

Jordan Bardella, candidato a primeiro ministro pola ultradereitista Agrupación Nacional (RN), acusou o presidente francés Emmanuel Macron de deixar o país "nos brazos da extrema esquerda de (Jean-Luc) Mélenchon".

"A alianza da deshonra tecida por Macron e Attal e os seus arranxos electorais coa extrema esquerda privaron os franceses do endereitamento político que escolleran" na primeira volta, lamentou Bardella, ao que as sondaxes daban como primeiro ministro máis probable.

Bardella, de 28 anos, achacou a inesperada derrota de RN "á desinformación" e "ás caricaturas" que os medios fixeron do seu partido, que gañara claramente a primeira volta do 30 de xuño, co 33,3 % e que vencera nas europeas do 9 de xuño cun resultado semellante.

O novo candidato, que foi recibido aos berros de "Jordan, Jordan" por decenas de militantes, deixou claro que, nunha Asemblea Nacional fragmentada cunha leve vantaxe da esquerda, o RN "estará contra a ecoloxía punitiva e a confiscación da soberanía nacional".

"Non entraremos en ningún acordo de fachada", aseverou, dando a entender que seguirán na oposición. O presidente de RN, con todo, destacou que, "a pesar da alianza contra natura", o seu partido "rexistra o maior crecemento" electoral da súa historia.

A líder do partido, Marine Le Pen, non falou aos militantes pero nalgunhas entrevistas asegurou que a deste domingo foi "unha vitoria en diferido" xa que a progresión do seu partido senta os cimentos dun triunfo que ve como inexorable.

"A marea subiu, non o suficiente esta vez, pero segue subindo. Foi unha vitoria en diferido", afirmou.

Os socialistas non aceptarán "coalición de contrarios"

O Partido Socialista (PS) francés, que nestas eleccións lexislativas acudiu ás urnas na coalición Nova Fronte Popular (NFP), advertiu este domingo que a esquerda non aceptará ningunha "coalición de contrarios que vaia traizoar o voto dos franceses e prolongar as políticas macronistas".

"Francia merecía máis que a alternativa entre neoliberalismo e fascismo", celebrou o primeiro secretario do PS Olivier Faure tras coñecer as primeiras proxeccións de voto.

O dirixente socialista pediu que recoñeza a súa derrota quen foi "desaprobado tres veces", en referencia ao macronismo, que non soubo impoñerse nas tres últimas citas coas urnas.

Pero sobre todo, incidiu en que prometan que non van "mesturar o seu voto co da extrema dereita" nos próximos anos para impedir as medidas de esquerda.

A votación deste domingo, que evitou "o peor", dixo, debe servir para abrir unha auténtica "refundación" que repare as gretas dun país moi dividido. Por iso, Faure chamou á unión a todos os franceses ao redor dos "valores republicanos".

Asegurou que a Nova Fronte Popular "debe facerse cargo desta nova páxina" da historia e prometeu que só haberá un "compás", que será o programa unitario acordado ao comezo da campaña.

Segundo Faure, a esquerda soubo unirse e encarnar a "esperanza" nun momento en que o presidente Emmanuel Macron sumiu o país na "incerteza" ao disolver a Asemblea Nacional no momento en que a extrema dereita se atopaba no seu punto "máis alto".

O expresidente socialista François Hollande, quen foi elixido deputado tras volver á política activa nestas eleccións, recoñeceu que, sen maioría absoluta, a esquerda debe mostrar "responsabilidade" para aplicar o seu programa e pacificar o país tras a fractura da campaña.

Cunha participación moi alta, en torno ao 67 %, a maior en varias décadas, moitos franceses parecen mobilizarse para frear a chegada ao poder da ultradereita tras o seu triunfo na primeira volta do 30 de xuño.

A maioría absoluta está en 289, unha cifra só alcanzable con pactos que agora mesmo se presentan como improbables perante o veto dos macronistas e os conservadores a LFI, que terá máis de 80 deputados dentro do paraugas do NFP.