A Fiscalía rexeita admitir a trámite a querela de Begoña Gómez contra o xuíz Peinado

A Fiscalía de Madrid opúxose a que o Tribunal Superior de Xustiza de Madrid admita a trámite a querela que interpuxo Begoña Gómez, muller do presidente do Goberno, contra o que xuíz Juan Carlos Peinado por presunta prevaricación.

Segundo informou este luns o Ministerio Público, o rexeitamento débese a que "neste momento e cos indicios e argumentos xurídicos que se achegan nesta querela (…), non se dan os presupostos legais esixidos para a súa admisión a trámite", debido a que o alto tribunal non atendeu a petición da Fiscalía que lle remita o testemuño íntegro da causa.

Trátase da terceira querela sobre a que se pronuncia a Fiscalía, que si se mostrou recentemente a favor da admisión a trámite da que interpuxo a Avogacía do Estado contra o xuíz Peinado por prevaricación, ao entender que non se pode descartar a priori que incorrese en delito ao ditar unha resolución "arbitraria e inxusta".

Antes pronunciouse en contra da que interpuxo o comunicador Máximo Pradera contra o maxistrado que investiga a Begoña Gómez, no seu caso por revelación de segredos ao informar sobre a causa.