A imaxe dun neno de 9 anos mutilado por un ataque israelí en Gaza gaña o World Press Photo

A fotógrafa palestina Samar Abu Elouf gañou este xoves o premio Foto do Ano do World Press Photo por unha imaxe dun neno de 9 anos de Gaza que perdeu ambos os brazos nun ataque israelí en marzo de 2024 e que foi evacuado a Doha para recibir tratamento.

Segundo anunciou este xoves a fundación do World Press Photo, con sede en Ámsterdam, Abu Elouf, que tamén foi evacuada á capital qatarí, logrou capturar para o xornal The New York Times a Foto do Ano, que mostra o custo humano da guerra e a importancia do xornalismo para contar historias como a de Mahmoud Ajjour, o neno que protagoniza a fotografía. 

O soño de Mahmoud: conseguir unha prótese e vivir a súa vida como calquera outro neno

A fotografía tomouse en Catar, onde Abu Elouf e Mahmoud comparten o mesmo complexo de apartamentos cos poucos gazatíes que lograron saír para recibir tratamento médico a feridas causadas polos bombardeos e explosións.

O pequeno de 9 anos resultou gravemente ferido mentres fuxía dun ataque israelí en Gaza, o que levou á amputación dos seus dous brazos.

“Despois de regresar para urxir á súa familia para seguir adiante, unha explosión arrincoulle un brazo e mutiloulle o outro”, explicou a fundación, que subliñou que “o soño de Mahmoud é simple: quere conseguir prótese e vivir a súa vida como calquera outro neno”.

Segundo a ONU, a 31 de decembro de 2024, Gaza tiña o maior número de nenos amputados per cápita do mundo.