Polo menos 31 mortos tras un bombardeo israelí contra unha escola en Gaza

Polo menos 31 persoas, incluídos 18 nenos, morreron e unhas 70 quedaron feridas nun bombardeo israelí  contra unha escola na cidade de Gaza que albergaba a miles de desprazados.

"Israel atacou a escola Dar Al-Arqam na cidade de Gaza con varios mísiles de enorme poder destrutivo, a pesar de que a escola alberga a miles de civís desprazados que se viron obrigados a abandonar os seus fogares debido ao brutal bombardeo en curso", denunciou o Goberno gazatí nun comunicado.

O Goberno gazatí, controlado polo grupo islamita Hamas, denuncia que os equipos de emerxencia están a ter dificultades para chegar aos puntos onde se atopan os feridos e algunhas das vítimas para poder trasladalos aos poucos hospitais que funcionan na cidade.

"O sector sanitario está a sufrir un colapso case total debido á destrución de hospitais e ao bloqueo en curso, o que fai extremadamente difícil brindar atención médica aos feridos", indicou.

O Exército israelí, pola súa banda, xustificou este bombardeo, como veu facendo desde o inicio da ofensiva, asegurando que o seu obxectivo eran "destacados terroristas que se atopaban nun centro de mando e control na zona de Gaza" sen mencionar no seu comunicado a escola.

"O centro de mando e control fora utilizado polos terroristas para planificar e executar ataques contra civís e soldados israelís", agrega.

O Executivo do enclave lembrou que Israel, desde o inicio da guerra en Gaza, o 7 de outubro de 2023, atacou polo menos 229 centros de desprazados "en flagrante violación de todas as convencións internacionais".

A ofensiva israelí en Gaza arrasou con miles de fogares dos gazatís, o que obrigou moitos deles a refuxiarse dos ataques en tendas de campaña ou en escolas baleiras.

Este novo ataque chega despois de que no último día os ataques israelís acabaron coa vida dun centenar de persoas, informou o Ministerio de Sanidade gazatí.