Trump di estar disposto a renegociar os aranceis se lle ofrecen "algo fenomenal" a cambio

Despois da convulsión mundial creada polo anuncio dos novos aranceis de Estados Unidos, nas últimas horas o presidente Trump mostrábase disposto a negociar con cada país. Iso si, se lle ofrecen algo fenomenal a cambio, dixo.

"Se alguén nos di que nos pode dar algo que sexa fenomenal, algo que sexa bo, TikTok é un exemplo. Temos a situación con TikTok onde A China probablemente dirá aprobaremos un acordo, pero farán algo cos aranceis? Os aranceis dannos un gran poder para negociar", asegurou Trump.

Nunhas declaracións aos medios, Trump comunicou ademais que a súa man dereita, o magnate Elon Musk, abandonará o goberno "nuns meses".

O republicano foi preguntado pola prensa a bordo do Air Force One sobre Musk, cuxa imaxe se viu afectada polas eleccións do martes ao Tribunal Supremo de Wisconsin nas que perdeu o xuíz conservador ao que apoiaba o empresario.