Médicos de toda España maniféstanse en Madrid para esixir á Sanidade un estatuto propio
A mobilización conta co respaldo do conxunto da profesión, desde os distintos sindicatos ao Foro da Profesión Médica
O Ministerio e a maioría de sindicatos que conforman a mesa de negociación como CCOO, UGT e CSIF renegan dun estatuto específico
A manifestación comezou ás 12 da mañá no Congreso e vai rematar no Ministerio de Sanidade
Milles de médicos manifástanse en Madrid para reclamar melloras na xornada laboral, no seu modelo retributivo e que se poña fin as gardas
O colectivo médico sae á rúa este sábado para esixir ao Ministerio de Sanidade un estatuto propio independente do que está a negociar para o conxunto de traballadores do Sistema Nacional de Saúde (SNS). Os médicos consideran que ese estatuto o único que fai é agravar as súas condicións laborais, que xa consideran precarias.
A manifestación de hoxe xa estaba prevista para o 22 de marzo, pero tivérana que aprazar polas malas condicións meteorolóxicas. A manifestación deste sábado está convocada pola Confederación Española de Sindicatos Médicos (CESM) co apoio do Sindicato Médico Andaluz (SMA) e vai partir ás 12 da mañá desde o Congreso para culminar diante do Ministerio.
A mobilización conta co respaldo do conxunto da profesión, desde os distintos sindicatos ao Foro da Profesión Médica, que aglutina o Consello Xeral de Colexios Oficiais de Médicos (CGCOM), a Federación de Asociacións Científico Médicas de España (Facme), a Conferencia Nacional de Decanos de Facultades de Medicina (CNDFM) e o Consello Estatal de Estudantes de Medicina (CEEM).
Tamén se sumaron o Consello Xeral de Colexios de Farmacéuticos, sociedades científicas e a Federación de Asociacións de Pacientes.
Baixo o lema "Por un estatuto propio da profesión médica e facultativa", os manifestantes expresarán o seu rexeitamento unánime ao borrador de estatuto marco, a lei que regula as condicións laborais do persoal do SNS, sanitario e non. E, sobre todo, á negativa do Ministerio para concederlles un estatuto propio, na súa opinión a única maneira posible de mellorar o seu modelo retributivo ou a xornada laboral ou a fin das gardas.
A ministra Mónica García insistiu este venres, falando deste asunto, en que o que hai encima da mesa é un borrador ao que lle queda moito camiño.
García puntualizou que foi o Ministerio o que introduciu no texto "os grandes avances" que supoñerá este estatuto marco, como a fin da temporalidade, a reordenación da xornada laboral e a redución das gardas de 24 horas, que só serán excepcionais en fin de semana co consentimento do profesional, a un máximo de 17 sen ter que devolver ningunha.
O Ministerio e a maioría de sindicatos que conforman a mesa de negociación como CCOO, UGT e CSIF renegan dun estatuto específico porque cren que as reivindicacións médicas teñen cabida no xeral.
O estatuto marco tamén está sendo criticado, aínda que por outros motivos, polas organizacións sindicais da mesa do ámbito de negociación como CSIF, CCOO ou UGT, que chegaron incuso a paralizala polo seu descontento sobre como se estaba desenvolvendo.
En concreto, o CSIF estudará o vindeiro mércores medidas de protesta tras concluír o prazo que deu ao Ministerio para presentar unha nova proposta con melloras salariais e unha nova clasificación para todos os colectivos e categorías.
