Entra en vigor o arancel do 10 % decretado por Trump para todas as importacións
O gravame afecta a todos os produtos que os Estados Unidos importan doutras nacións
Os aranceis adicionais aplicados só a algúns países entrará en vigor o vindeiro 9 de abril
O arancel global do 10 % que o presidente estadounidense, Donald Trump, anunciou esta semana entrou en vigor este sábado, ás 00:01 hora local do leste dos EUA, nunha medida que ameaza con provocar aínda máis turbulencias nas bolsas internacionais.
O 2 de abril, nunha xornada bautizada como "O día da liberación", Trump anunciou ese gravame xeral do 10 % para 184 territorios, cun incremento engadido para determinados países, que ascende ao 20 % na UE ou ao 34 % na China.
Esa escalada arancelaria adicional aplicada só a algúns socios comerciais de Washington entrará en vigor, ás 00:01 hora local do leste dos EUA, do 9 de abril.
Gravame global do 10 %
O que comeza a aplicarse a partir deste intre é o gravame global do 10 % que afecta a todos os produtos que os Estados Unidos importan doutras nacións.
Con todo, líbranse do arancel as mercadorías xa cargadas nun barco, en tránsito cara aos EUA, antes das 00:01 horas deste sábado, segundo figura na orde executiva que Trump asinou o mércores para poñer en funcionamento estas medidas.
Ameaza ao libre comercio
Os aranceis impostos por Trump supoñen unha ameaza para os cimentos do libre comercio que definiron o mundo durante décadas e xa desataron unha guerra comercial con aliados tradicionais de Washington, como o Canadá, e adversarios como a China, que anunciou os seus propios gravames.
Do mesmo xeito, avivaron o medo a unha retardación económica, co banco máis grande dos EUA, JPMorgan Chase, elevando as posibilidades dunha recesión global do 40 ao 60 %.
Fábrica que traballa para unha multinacional dos EUA en Lesotho. REUTERS/Siphiwe Sibeko
Prexuízos internos
Dentro dos EUA, o presidente da Reserva Federal (Fed), Jerome Powell, advertiu este venres que os aranceis de Trump poderían traducirse nun menor crecemento económico e nunha maior inflación, que podería ser persistente e non temporal.
Os tributos tamén ameazan con encarecer, dentro do propio país, bens como as vivendas, os automóbiles e a roupa, prexudicando especialmente ás familias máis pobres, que poderían experimentar unha caída de capital de ata o 5,5 %, segundo un estudo da Universidade de Yale.
Emerxencia nacional
Trump impuxo os aranceis recorrendo á autoridade adicional que ten como presidente para declarar unha "emerxencia nacional", algo que fixo argumentando que a situación comercial actual supón un risco para a seguridade dos Estados Unidos.
O mandatario prometeu que os aranceis farán que volvan aos EUA os empregos que se trasladaron a países con man de obra máis barata nas últimas décadas. Porén, tamén recoñeceu que podería haber un período de "transición" doloroso para as familias estadounidenses.
Lei arancelaria Smoot-Hawley
A última vez que os aranceis estadounidenses estiveron tan altos foi despois de que o presidente Herbert Hoover (1929-1933) promulgara a controvertida lei arancelaria Smoot-Hawley no1930, que elevou os tributos sobre moitos produtos importados a case o 40 %.
A esta medida atribúeselle empeorar a Gran Depresión, tamén coñecida como Crise de 1929, que durou ata os anos previos á Segunda Guerra Mundial.
Pánico nos mercados financeiros
Unha das consecuencias máis visibles son as turbulencias e o pánico nos mercados financeiros con caídas que non se daban desde a pandemia da covid en 2020.
Para dar unha idea, o xoves e venres a bolsa española perdeu 50.000 millóns de euros e os bancos do noso país viron como se evaporaban 27.000 millóns de euros do seu valor entre onte e antonte.
A sangría na bolsa estadounidense tamén é das que fai época. Tomemos un exemplo ilustrativo: os recortes estatais que ía facer Elon Musk volvéronse en contra de si mesmo e desde a toma de posesión de Trump Tesla sofre perdas estarrecedoras: 602.000 millóns de dólares.
Este venres, esboroábase de novo a súa cotización coa baixada dun 10 % na liña das outras grandes tecnolóxicas ianquis.
Efectos na economía española
Pero como afectará iso á economía española? O impacto no viño, aceite de oliva, aceiro e algúns produtos de maquinaria é sabida. Os expertos din que o golpe será moi moderado, de dúas décimas no crecemento do PIB.
E todo indica que os consumidores non o sufrirán dramaticamente, co petróleo á baixa por un tempo, os excedentes de aceite e viño quizais algo máis baratos no mercado interior e cunha previsible avalancha de produtos baratos da China estimulando a competencia de prezos.
