Requisan unha tonelada de cocaína no porto de Valencia

A Policía Nacional desarticulou unha organización criminal que introducía cocaína en colectores a través do porto de Valencia. En total, os axentes comisaron mil quilos de droga e detiveron vinte persoas, dezasete delas en España.

A operación iniciouse hai un ano, ao constatarse que estaba entrando droga de forma "parasitaria" procedente de Colombia, que chegaba en contedores nos que se transportaba mercadoría legal e sen que o operador o soubese. Unha vez no porto a organización marcaba os colectores que a contiñan para que uns terceiros a puidesen sacar.

"Contaban con "homes araña" que agatuñaban polas pilas de colectores que hai no porto ata chegar ao que contiña o estupefaciente para realizar a apertura e traslado da droga ata o camión que a debía levar ata as "gardarías". Parte dos arrestados estaban vinculados cunha facción dos Hells Angels de Bélxica e dedicábanse a controlar e recuperar os envíos do estupefaciente", describiu María Buyo, portavoz da Policía Nacional.

Despois a droga distribuíase a distintos países de Europa. Os axentes constataron que o xefe da rede era un dos criminais máis importantes de Bélxica, fuxido da xustiza desde hai catro anos e que se agochaba en casas de luxo da costa do Levante.

"Foron detidas vinte persoas: dezasete en España, dúas en Bélxica e unha en Francia. Fixéronse once rexistros en España e Bélxica, requisáronse máis de mil quilos de cocaína, moedeiros virtuais, armas de fogo, oito vehículos de gama alta, armas prohibidas, 15.000 euros en efectivo e un camión", informou Buyo.

A operación estivo coordinada pola Europol.