Sofre un accidente en Rubiá, pide asistencia ao 112 e logo desaparece
O seu teléfono enviou un aviso automático á Axencia Galega de Emerxencias que logrou contactar co implicado
Malia solicitar axuda, cando chegaron ao lugar o vehículo estaba nunha zona de monte sen ninguén no interior
Tras varias pescudas, a Garda Civil conseguiu localizalo nun hospital, a onde fora trasladado por un veciño
Os servizos de emerxencias toparon este sábado de madrugada un coche accidentado, sen ninguén no seu interior, no concello ourensán de Rubiá, logo de recibir o aviso do móbil do implicado e de contactar con el.
Segundo informa o 112 Galicia, a primeira comunicación do accidente recibírona a través dun aviso automático do teléfono, que daba conta dun sinistro ocorrido no quilómetro 439 da N-120, en Pardollán.
Despois, lograron contactar co condutor que, nun primeiro momento, non quixo asistencia sanitaria. Porén, un pouco despois, asegurou que podería necesitala.
Con todo, cando os servizos de emerxencia chegaron ao lugar, toparon o vehículo accidentado nunha zona de monte, pero sen ninguén no interior nin nas proximidades.
Os Bombeiros e o GES de Valdeorras colaboraron coa Garda Civil de Tráfico para rastrexar a contorna, sen éxito. Tras realizar varias pescudas, as forzas de seguridade conseguiron localizado: fora trasladado por un veciño ao hospital.
