Soben a 3.354 as mortes polo tremor que sacudiu Myanmar hai unha semana
Segundo a xunta militar birmana, hai 4.850 persoas feridas e 220 desaparecidas
Nos últimos sete días, os servizos de emerxencia rescataron con vida 653 persoas
Sobreviventes do tremor nunha rúa de Mandalay. REUTERS
A xunta militar birmana, que se atribuíu o poder en Myanmar tras o golpe de Estado do 2021, elevou este sábado a 3.354 as mortes causadas polo tremor de magnitude 7,7 rexistrado o 28 de marzo.
Mentres, continúa a remoción de entullos e a procura de persoas desaparecidas, principalmente nas seis zonas declaradas en estado de emerxencia.
A través do xornal oficialista Global New Light of Myanmar, as forzas armadas aseguran que tamén hai 4.850 persoas feridas e 220 desaparecidas.
Os servizos de emerxencia locais, que contan coa colaboración de equipos internacionais, rescataron con vida 653 persoas durante a última semana.
