As medallas do Parlamento 2025 premian a divulgación do seu patrimonio artístico
A cámara galega distinguiu a Ramón Villares, a obra social Abanca e a RAG de Belas Artes
O Parlamento ten unha das coleccións de arte contemporánea máis importantes de Galicia. Este sábado, quixo condecorar coas súas medallas as persoas e institucións que teñen colaborado na divulgación dese patrimonio.
Neste 2024, a cámara galega recoñeceu o traballo da Real Academia Galega de Belas Artes, da Afundación-Obra Social Abanca e do catedrático de Historia Contemporánea da USC Ramón Villares.
O presidente do Parlamento, Miguel Santalices, agradeceulles a dedicación e o esforzo por conservar o patrimonio artístico da institución. Na súa intervención, salientou tamén a importancia de ter unha Europa unida e forte.
Manuel Quintana Martelo, presidente da Real Academia Galega de Belas Artes, salientou o compromiso da cámara a prol da arte galega. Pola súa banda, o presidente da Afundación-Obra Social Abanca, Miguel Ángel Escotet, tivo unha lembranza para a emigración.
O outro galardoado, o ex-presidente do Consello da Cultura Galega e catedrático da USC, Ramón Villares, insistiu na importancia de fuxir da polarización política.
O presidente da Xunta foi o encargado de pechar a cerimonia, que desta volta non se celebrou o tradicional 6 de abril, aniversario da promulgación do Estatuto de Autonomía, ao caer en domingo.
Durante a súa intervención, Alfonso Rueda destacou a importancia de blindar o Estado de Benestar e acadar pactos.
Alfonso Rueda e Miguel Santalices cos premiados. EFE/Xurxo Martínez
Colaboración dos premiados coa cámara
A Real Academia Galega de Belas Artes traballa desde 2018 de forma permanente na difusión, estudo, investigación e conservación da colección artística da cámara.
Afundación-Obra Social Abanca comparte co Parlamento "un interese común pola difusión da arte e a cultura galegas", defenden desde a institución nun comunicado. Colaboran na difusión das súas respectivas coleccións de arte a través de mostras, intercambio de pezas ou realización de estudos.
Ramón Villares traballou co Parlamento como comisario da exposición O poder da palabra, na conmemoración do 40 aniversario deste órgano, e en varias publicacións.
Edicións anteriores
O deste ano é o primeiro recoñecemento desde 2023, xa que no ano 2024 o galardón non foi concedido pola coincidencia coas datas do comezo da XII lexislatura.
A última distinción, entregada hai dous anos, recoñeceu a cooperación transfronteiriza entre Galicia e a rexión Norte de Portugal.
En edicións anteriores, a condecoración entregouse aos expresidentes do Parlamento e a institucións como Cáritas diocesana, o Valedor do Pobo ou o Consello da Cultura Galega.
